Россиянинг БМТдаги доимий вакили Василий Небензя матбуот-анжуманида Бучада ўнлаб тинч аҳолининг ўлдирилиши «рус ҳарбийларини обрўсизлантириш, уларни ноинсоний кўрсатиш ва Россияда сиёсий босим ўтказига қаратилган навбатдаги провакация» ҳисобланишини маълум қилди.
Небензянинг айтишича, «провакация»нинг ортида Киев ҳукумати ва «уларнинг Ғарбдаги ҳомийлари» турибди.
Россия доимий вакилининг маълум қилишича, 4 апрель куни Украина президенти Владимир Зеленский Бучага ташриф буюриб, содир бўлган ҳолат ҳар қандай маданиятсиз жавобни оқлашини кўрсатган. «У Киев режими геноцидни уруш усули деб билишини тасдиқлади», — дейди Небензя.
Россиянинг БМТдаги доимий вакили Россия томонининг далилларини яна такрорлаб, Буча кўчаларида ўлдирилган инсонларнинг фото ва видеолар рус қўшинлари ушбу ҳудудни тарк этганидан бир неча кун ўтиб пайдо бўлганини айтди. Унинг таъкидлашича, Россия ҳарбийлари кетган вақтдаги видеоёзувларда қурбонлар жасади бўлмаган.
Небензя Бучага оид видеоларнинг барчаси фейк эканини айтган. «Бу уруш. Урушдан ҳар нарсани кутиш мумкин. Урушда тинч аҳоли ҳам қурбон бўлади, буни мустасно қилиб бўлмайди. Бу ҳаётнинг аччиқ ҳақиқати. Аммо Бучадан олинган видеолавҳаларнинг уйдирма экани кўриниб турибди. Ушбу лавҳаларнинг барчаси ёлғон. Эртага Ҳавфсизлик кенгашида биз бу борада далилларни тақдим этамиз», — дейди у.
The New York Times газетаси Небензянинг чиқишидан бир неча соат олдин Бучанинг сунъий йўлдошдан олинган суратларини эълон қилган. Унинг таҳилларига кўра, кўчалардаги жасадлар рус ҳарбийлари шаҳарни назорат остида ушлаган вақтда ҳам бўлган.
Эслатиб ўтамиз, Киев вилоятидаги Буча шаҳрида тинч аҳолининг қирғин қилингани 2 апрель куни, Россия ҳарбийлари чиқиб кетганидан кейин Украина армияси шаҳар устидан назорат ўрнатган пайтда маълум бўлди. Украина президенти маҳаллий аҳолининг ўлимида россиялик аскарларни айблади. Россия Мудофаа вазирлиги ҳалок бўлганларнинг видео ва суратларини «провокация» ва «Ғарб оммавий ахборот воситалари учун Киев режимининг томошаси» деб атади. Вазирлик маълумотларига кўра, рус ҳарбийлари 30 март куни шаҳарни тарк этгунга қадар Буча шаҳридаги бирорта ҳам маҳаллий аҳоли «ҳеч қандай зўравонлик ҳаракатларидан жабр кўрмаган».
Изоҳ (0)