Davlat xavfsizlik xizmati O‘zbekistonning bir qator hududlarida firibgarlik holatlariga chek qo‘ydi. Bu haqda DXX axborot xizmati xabar qildi.
Qayd etilishicha, Davlat xavfsizlik xizmatining Qoraqalpog‘iston Respublikasi bo‘yicha boshqarmasi va Iqtisodiy jinoyatlarga qarshi kurashish departamenti xodimlari hamkorligida tekshiruvlar o‘tkazilgan. Tadbirlar davomida Amudaryo tumani xalq ta’limi bo‘limi hamda qurilish-ta’mirlash ishlari bilan shug‘ullanuvchi 2 ta MCHJ mansabdor shaxslari o‘zaro til biriktirib, tumandagi umumiy o‘rta ta’lim maktablaridan birining o‘quv binolarini ta’mirlash uchun ajratilgan jami 1 milliard 235 million so‘m pul mablag‘ining 177,6 million so‘mini talon-toroj qilgani aniqlangan. Ular hisob-fakturalarga soxta ma’lumotlar va yozuvlar kiritish orqali noqonuniy o‘zlashtirgan.
Shuningdek, Amudaryo tumanidagi umumiy o‘rta ta’lim maktablaridan birining o‘qituvchisi o‘z hamkasbining ishonchiga kirib, tanishlari orqali uni malaka toifasi olish bo‘yicha attestatsiyadan o‘tkazib berishni va’da qilgan. U xizmati evaziga 600 dollar olgan vaqtida ushlangan.
Qashqadaryo viloyati Koson tumanidagi umumiy o‘rta ta’lim maktablaridan birining direktori esa fuqaroni o‘qituvchi lavozimiga ishga qabul qilish evaziga 400 dollari olgan vaqtida qo‘lga olingan.
DXX va Bosh prokuratura huzuridagi departament xodimlari tomonidan Toshkent shahrida o‘tkazilgan tezkor tadbirda esa bir shaxs (1999-yilda tug‘ilgan) 2 nafar fuqaroni poytaxtdagi nodavlat oliy ta’lim muassasalaridan biriga o‘qishga kiritib qo‘yish evaziga 24 million so‘m olgan vaqtida ushlangan.
Sirdaryo viloyati Guliston shahrida yashovchi muqaddam firibgarlik bilan bog‘liq jinoyat sodir etgani uchun sudlangan shaxs (1992-yilda tug‘ilgan) boshqa bir fuqaroni (1991-yilda tug‘ilgan) hokimiyat idoralarida ishlovchi tanishlari orqali “ayollar daftari”ga kiritib, yangi qurilayotgan ko‘p qavatli uylardan 3 xonali xonadon sotib olishi uchun subsidiya olishida yordam berishini aytgan. U evaziga 400 dollar olgan vaqtida ushlangan.
Barcha holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilgan. Hozirda tergov harakatlari olib borilmoqda.
Izoh (0)