Қорақалпоғистонда мактабни таъмирлаш учун ажратилган қарийб 180 млн сўмни ўзлаштирган 2 нафар мансабдор ушланди

Давлат хавфсизлик хизмати Ўзбекистоннинг бир қатор ҳудудларида фирибгарлик ҳолатларига чек қўйди. Бу ҳақда ДХХ ахборот хизмати хабар қилди.

Қайд этилишича, Давлат хавфсизлик хизматининг Қорақалпоғистон Республикаси бўйича бошқармаси ва Иқтисодий жиноятларга қарши курашиш департаменти ходимлари ҳамкорлигида текширувлар ўтказилган. Тадбирлар давомида Амударё тумани халқ таълими бўлими ҳамда қурилиш-таъмирлаш ишлари билан шуғулланувчи 2 та МЧЖ мансабдор шахслари ўзаро тил бириктириб, тумандаги умумий ўрта таълим мактабларидан бирининг ўқув биноларини таъмирлаш учун ажратилган жами 1 миллиард 235 миллион сўм пул маблағининг 177,6 миллион сўмини талон-торож қилгани аниқланган. Улар ҳисоб-фактураларга сохта маълумотлар ва ёзувлар киритиш орқали ноқонуний ўзлаштирган.

Шунингдек, Амударё туманидаги умумий ўрта таълим мактабларидан бирининг ўқитувчиси ўз ҳамкасбининг ишончига кириб, танишлари орқали уни малака тоифаси олиш бўйича аттестациядан ўтказиб беришни ваъда қилган. У хизмати эвазига 600 доллар олган вақтида ушланган.

Қашқадарё вилояти Косон туманидаги умумий ўрта таълим мактабларидан бирининг директори эса фуқарони ўқитувчи лавозимига ишга қабул қилиш эвазига 400 доллари олган вақтида қўлга олинган.

ДХХ ва Бош прокуратура ҳузуридаги департамент ходимлари томонидан Тошкент шаҳрида ўтказилган тезкор тадбирда эса бир шахс (1999 йилда туғилган) 2 нафар фуқарони пойтахтдаги нодавлат олий таълим муассасаларидан бирига ўқишга киритиб қўйиш эвазига 24 миллион сўм олган вақтида ушланган.

Сирдарё вилояти Гулистон шаҳрида яшовчи муқаддам фирибгарлик билан боғлиқ жиноят содир этгани учун судланган шахс (1992 йилда туғилган) бошқа бир фуқарони (1991 йилда туғилган) ҳокимият идораларида ишловчи танишлари орқали «аёллар дафтари»га киритиб, янги қурилаётган кўп қаватли уйлардан 3 хонали хонадон сотиб олиши учун субсидия олишида ёрдам беришини айтган. У эвазига 400 доллар олган вақтида ушланган.

Барча ҳолатлар юзасидан Жиноят кодексининг тегишли моддалари билан жиноят ишлари қўзғатилган. Ҳозирда тергов ҳаракатлари олиб борилмоқда.