“PSJ” hujumchisi Kilian Mbappe JCh—2022 qur’a tashlash marosimida ishtirok etishdan bosh tortdi.
Qatar vakillari 1-aprel kuni Dohada bo‘lib o‘tadigan marosimda Kilian Mbappeni ham maxsus mehmon bo‘lishini xohlagan edi.
Qatarliklar Mbappening tashrifi borasida “PSJ” va Fransiya futbol federatsiyasi bilan kelishib qo‘ygan edi. Ammo futbolchining o‘zi Fransiya terma jamoasining sardori emasligini tushuntirib, qur’a marosimiga borishdan bosh tortdi, deya xabar beradi L’Equipe. Ma’lumot uchun, hozirda Fransiya terma jamoasining sardori Ugo Lyoris hisoblanadi.
Undan tashqari 23 yoshli hujumchi 3-aprel kuniga mo‘ljallangan “Loryan”ga qarshi bahsga ko‘proq tayyorgarlik ko‘rishni xohlaydi.
Shu tariqa Dohada bo‘lib o‘tadigan marosimga Fransiya nomidan boshqa futbolchi boradigan bo‘ldi.
Mbappe 2017-yildan buyon “PSJ” sharafini himoya qilib kelmoqda. Futbolchining parijliklar bilan shartnomasi 2022-yil iyun oyida o‘z nihoyasiga yetadi. Joriy mavsum futbolchi Fransiya chempionatining 26 o‘yinida ishtirok etib, 15 ta gol va 10 ta golli uzatmaga mualliflik qildi.
Izoh (0)