“Barselona”ning sobiq hujumchisi Serxio Aguero faoliyatini qayta tiklamoqchi. Bu haqda sobiq futbolchining o‘zi ma’lum qildi.
“FIFA menga afsona sifatida munosabatda bo‘lmoqda, lekin kecha yana maydonga chiqish haqida o‘ylab qoldim.
Shifokorlar 5–6 oy futboldan uzoq turishimni aytgandi, ammo mashg‘ulotlarda ishtirok etishni o‘ylayapman. Menga ‘Inter Mayami’dan qo‘ng‘iroq bo‘ldi, rad javobini berdim”, — deydi Aguero.
33 yoshli argentinalik futbolchi 2021-yil dekabr oyida yuragi bilab bog‘liq muammo tufayli butsisini mixga ilgan edi.
Kun Aguero faoliyatini Argentinaning “Independyente” jamoasida boshlagan. 2003-yildan 2006-yilga qadar ushbu jamoada to‘p surgan hujumchi 56 ta o‘yinda 23 ta gol urishga muvaffaq bo‘lgan. Bu esa Yevropaning yetakchi jamoalari qiziqishiga sababchi bo‘lgandi.
2006-yilda Ispaniyaning “Atletiko” jamoasi Agueroni xarid qiladi. Kun “matraschilar” safida 234 o‘yinda 101 ta gol urgan.
2011-yilda argentinalik hujumchi “Manchester Siti” safiga borib qo‘shiladi. Ingliz jamoasi safida 390 o‘yinda 260 ta gol urib, “shaharliklar” tarixidagi eng yaxshi to‘purarga aylandi.
“Manchester Siti” bilan shartnomasi yakuniga yetgan Aguero 2021-yilda “Barselona”ga o‘tadi. Serxio “ko‘k-anorranglilar” safida 3 ta o‘yinda ishtirok etib, 1 ta golni o‘z hisobiga yozdirib qo‘ydi.
Izoh (0)