Jinoyat ishlari bo‘yicha Shahrixon tuman sudi janjal sabab erini pichoqlagan ayolni 5 yilga ozodlikdan mahrum qildi. Biroq hayoti saqlab qolingan erning da’vosidan voz kechishi va ayni paytda birga yashayotganini inobatga olib, tayinlangan jazoni ikki yillik ozodlikni cheklash jazosi bilan almashtirdi. Bu haqda “Daryo”ga viloyat sudi axborot xizmati xabar bermoqda.
Aniqlanishicha, Ma’rifat (barcha ismlar o‘zgartirilgan) Davron bilan 2007-yilda turmush qurgan. Ularning ikki nafar farzandi bor. Er-xotin 2021-yilning 2-oktabr kuni soat 21:30 da oilaviy kelishmovchilik sabab janjallashib qolgan. Janjal vaqtida Ma’rifat turmush o‘rtog‘i Davronning orqa chap ko‘krak qafasiga xo‘jalik pichog‘i bilan qasddan bir marta urib, hayoti uchun xavfli jarohat yetkazgan.“O‘sha kuni soat 17:00 larda turmush o‘rtog‘im va o‘g‘lim bilan birga o‘tirib ovqatlandik. Xufton vaqti yaqinlashganida erim mahalladagi masjidga chiqadigan bo‘ldi. Ketayotganida o‘g‘lim ikkimizni onamning uyiga tashlab o‘tdi. Shunda qizim chiqib, buvisining uyida yotib qolishini iltimos qildi. Unga dadasidan ruxsat so‘rashi lozimligini aytdim. Keyin qizim otasidan ruxsat so‘rash uchun ko‘chaga chiqdi va qaytib kirdi. Birozdan so‘ng erim menga qo‘ng‘iroq qilib ‘nimaga o‘zing chiqmasdan, qizingning o‘zini chiqarib yubording?’, deb qattiq gapirdi. Onamning uyida biroz o‘tirdik. Erim namozdan qaytgach, birga uyga keldik. Uyda turmush o‘rtog‘im ‘nimaga gapirmayapsan?’, deb do‘q qilganida ikkimiz gap talashib qoldik. Shunda u jag‘imdan ushlab ‘ovozingni o‘chir’, deb siltab yubordi. Bundan achchiqlanib ‘nimaga urasiz, aybim nima?’ deb, qo‘limdagi pichoqni u tomonga siltaganimda orqa chap ko‘krak qafasiga tegib ketdi. Avvaliga tegmadi deb o‘ylagandim. Shu sababli qo‘limdagi pichoqni hovlidagi gulzor ichiga tashlab, hammomga yuz-qo‘llarimni yuvishga kirib ketdim. Shu payt birdan o‘g‘lim chaqirdi. Hovliga qaytib chiqqanimda turmush o‘rtog‘imning ko‘krak qafasidan qon oqayotganini ko‘rib, qo‘rqib ketdim. Uning kiyimini qon chiqayotgan joyga bosib turdim. Keyin qo‘shnimiz Habibullo aka bilan tumandagi, keyin esa viloyatdagi shifoxonalarga olib bordik. Men atay qilmagandim”, — deydi sudlanuvchi.
Sudya Umidjon Soliyevning ta’kidlashicha, sud jarayonida jabrlanuvchi holat yuz bergan kuniyoq turmush o‘rtog‘ini kechirganini, unga nisbatan hech qanday da’vosi yo‘qligini bildirgan. Shuningdek, u bilan birga yashayotganini, qaramog‘ida ikki nafar farzandi borligini, agarda xotiniga nisbatan ozodlikdan mahrum qilish bilan bog‘liq jazo tayinlanadigan bo‘lsa, yana oilalari o‘rtasiga sovuqchilik tushishi, farzandlari sarson bo‘lishi mumkinligini inobatga olishini so‘rab, yengilroq jazo tayinlanishini iltimos qilgan.
Sud hukmi bilan Ma’rifat Jinoyat kodeksining 104-moddasi 2-qismining “l” bandida (qurolni yoki sovuq qurol sifatida foydalanilishi mumkin bo‘lgan ashyolarni ishlatib sodir etilgan qasddan badanga og‘ir shikast yetkazish) nazarda tutilgan jinoyatni sodir etganlikda aybdor deb topilib, unga nisbatan 5 yil ozodlikdan mahrum qilish jazosi tayinlangan. Biroq unga nisbatan mazkur Kodeksning 72-moddasi qo‘llanib, tayinlangan ozodlikdan mahrum qilish jazosi shartli hukm qilinib, ikki yil sinov muddati belgilangan.
Izoh (0)