O‘zbekiston Ekologiya va atrof-muhitni muhofaza qilish davlat qo‘mitasi xizmat mashina parkiga 10 dona elektromobil xarid qildi. Bu haqda qo‘mita matbuot xizmati xabar berdi.
“Kelajakda qo‘mitaning barcha xizmat mashinalarini elektromobillarga almashtirish va ularni muqobil energiya manbalari hisobidan quvvatlash tizimini joriy qilish rejalashtirilgan”, — deyiladi xabarda.
Avvalroq Iqtisodiy taraqqiyot va kambag‘allikni qisqartirish vazirligi “Elektromobillar ishlab chiqarish va ulardan foydalanishni tashkil etishni qo‘llab-quvvatlash choralari to‘g‘risida”gi prezident qarori loyihasini muhokamaga qo‘ygandi. Hujjatga muvofiq vazirliklar, idoralar, budjet tashkilotlari, mahalliy hokimiyat organlari hamda ustav kapitalida davlat ulushi 50 foizdan ortiq bo‘lgan korxonalar xizmat avtomobillari parkining 2025-yilga qadar kamida 10 foizigacha, 2030-yilga qadar 100 foizi bosqichma-bosqich elektromobillarga almashtirilishi belgilangan.
Bunda, mazkur bandda nazarda tutilgan tashkilotlar tomonidan 2022-yildan boshlab xarid qilinadigan transport vositalarining kamida 20 foizi elektromobillar bo‘lishi talab etiladi.
Bundan tashqari qaror loyihasida vazirliklar, idoralar, budjet tashkilotlari, xo‘jalik birlashmalari, mahalliy hokimiyat organlari hamda ustav kapitalida davlat ulushi 50 foizdan ortiq bo‘lgan korxonalar elektrobuslarni mahalliy ishlab chiqaruvchi va servis xizmatiga ega korxonalardan xarid qilishi belgilangan.
Mavzuga doir:
Izoh (0)