Ijtimoiy tarmoqlarda Sirdaryodagi maktablarning birida o‘quvchi qizlar o‘rtasida bo‘lgan janjal videotasviri tarqaldi. Sirdaryo viloyati IIB holatga munosabat bildirib, videodagi qizlarning shaxsi aniqlanganini ma’lum qildi.
Ijtimoiy tarmoqlarda tarqalgan videoda bir necha qizlar janjallashayotgani tasvirlangan, yigitlar esa holatni telefonda videoga olib turgan. Sirdaryo viloyati IIB xodimlari tomonidan barcha voqea qatnashchilari aniqlanib, surishtiruv ishlari olib borilgan.
Ma’lum qilinishicha, Guliston shahridagi 4, 5 va 18-sonli umumta’lim maktablarining o‘quvchi qizlari Instagram ijtimoiy tarmog‘i orqali bir-birini haqorat qilgani natijasida janjal kelib chiqqan. Ikki nafar yigit esa ularning janjalini videoga olib, Telegram orqali tarqatib yuborgan.
Hozirda holat bo‘yicha mas’ul xodimlar tomonidan tergovga qadar tekshiruv harakatlari olib borilmoqda. Qizlarning ota-onalari farzandlari tarbiyasiga yetarli darajada e’tibor bermaganliklarini tan olib, uzr so‘ragan.
O‘z navbatida Xalq ta’limi vazirligi Sirdaryodagi holat ayni damda mutasaddilar tomonidan o‘rganilayotganini ma’lum qilgan.
“Shu o‘rinda ota-onalardan bunday salbiy holatlar yuz bermasligi uchun farzandlari tarbiyasiga e’tiborli bo‘lishlarini so‘rab qolamiz”, — deyiladi xabarda.
Bundan oldin Asakada maktab o‘quvchilari o‘rtasida ommaviy mushtlashuv sodir bo‘lgani, Toshkentda ikki maktab o‘quvchilari o‘zaro janjallashgani to‘g‘risida xabar berilgandi.
Izoh (0)