Namanganlik tadbirkorlar tomonidan Qoraqalpog‘istonning Qorao‘zak tumaniga maishiy va servis xizmatlari ko‘rsatishga moslashtirilgan konteynerlar yetkazib berildi. Bu haqda “Daryo” muxbiri Azizbek Abduvaliyev xabar bermoqda.
Umumiy summasi 1,9 milliard so‘m bo‘lgan 13 ta konteyner ovul fuqarolar yig‘inlari markazlariga o‘rnatilmoqda.
“Mazkur konteynerlarga sartaroshxona, chevarxona, poyabzallarni ta’mirlash va avtomobillarga texnik xizmat ko‘rsatish shoxobchalari joylashtiriladi. Ularda tajribali mutaxassislar ish boshlaydi va mahalliy yoshlardan shogirdlar tayyorlaydi. Shu tariqa konteynerlarning har birida o‘rtacha 10 ta yangi ish o‘rni yaratiladi”, — deydi Namangan viloyat investitsiyalar va tashqi savdo boshqarmasi axborot xizmati xodimi Orifjon Ayubxonov.
Mazkur loyiha Orolbo‘yini rivojlantirish maqsadida Qorao‘zak tumaniga biriktirilgan Namangan viloyat hokimligi tashabbusi bilan amalga oshirilmoqda. Bunday loyihalarni muvofiqlashtirib borish maqsadida hokimlik tomonidan tumanda Namangan viloyatining vakolatxonasi ham tashkil etilgan.
Mavzuga doir:
- Hududlarga biriktirilgan viloyat hokimlari, kichik tumanlarga beriladigan katta mablag‘lar, qiymati 108 million dollar bo‘lgan shamol elektr stansiyasi — prezidentning Qoraqalpog‘istonga tashrifidan keyingi xulosalar
- Namanganlik tadbirkorlar Qoraqalpog‘istonda bo‘sh yerlarni o‘zlashtirib, qishloq xo‘jaligi klasterlarini tashkil etmoqda — Shavkat Abdurazzoqov
Izoh (0)