Buxoro shahriga “Butunjahon hunarmandlar shahri” maqomi berilishi kutilmoqda. Bu haqda Buxoroga Butunjahon hunarmandchilik kengashining Osiyo—Tinch okeani mintaqasi prezidenti Saad al-Kaddumi hamda professor Ali Sha Alnajadaxaning tashrifi paytida ma’lum qilindi, deya xabar berdi “Daryo” muxbiri.
“Hunarmand” uyushmasining viloyat boshqarmasi boshlig‘i Mirshod Naimov ma’lum qilishicha, Butunjahon hunarmandchilik kengashining Osiyo—Tinch okeani mintaqasi prezidenti Saad al-Kaddumi hamda professor Ali Sha Alnajadaxa Buxoroning eski shahridagi hunarmandlar faoliyati, ularga yaratilgan shart-sharoitlar va imkoniyatlarni o‘rgangan.“Ularning tashrifidan maqsad Buxoro shahriga ‘Butunjahon hunarmandlar shahri’ maqomini berish bo‘yicha xulosalar berishdan iborat edi. Shahrimizning bu yuksak xulosaga erisha olgani barchamizning quvonchimizga aylandi. Ma’lumki, 2021-yilning 29-aprelida prezidentimizning Buxoroda xalqaro zardo‘zlik va zargarlik festivalini o‘tkazish to‘g‘risidagi qarori e’lon qilingan edi. Ushbu qaror ijrosini ta’minlash maqsadida 2022-yilning 21—25-may kunlari Buxoro shahrida birinchi xalqaro zardo‘zlik va zargarlik festivalini o‘tkazish rejalashtirilgan. Xuddi shu festivalda Buxoro shahriga ‘Butunjahon hunarmandlar shahri’ maqomi beriladigan bo‘ldi”, — deydi Mirshod Naimov.
Bildirilishicha, O‘zbekistonning qator hududlari, jumladan, Farg‘ona, Samarqand, Xorazm va boshqa viloyatlari hunarmandlari hunarmandchilikning 20 ga yaqin yo‘nalishlarida ish olib boradi. Buxoroda esa hunarmandchilikning 34 ta yo‘nalishi rivojlangan.
Islom hamkorlik tashkiloti 2007-yilda Toshkent shahri, 2020-yilda esa Buxoroni Islom madaniyati poytaxti deb e’lon qilgandi.
Mavzuga doir: Buxoro Islom madaniyati poytaxti bo‘ladi
Izoh (0)