Қозоғистон Фавқулодда вазиятлар вазирлигининг қутқарувчилари ўтган сутка давомида ноқулай об-ҳаво туфайли фавқулодда вазиятга тушиб қолган 372 кишини, жумладан, 312 нафар болани эвакуация қилди. Оқмола, Қарағанда, Павлодар ва Қўстанай вилоятларидаги назорат-ўтказиш пунктларида 1,5 мингга яқин автомашиналар ҳаракати тўхтатилди, ўнлаб одамлар иссиқлик пунктларига жойлаштирилди, деб хабар бермоқда ФВВ матбуот маркази.
«Айни пайтда Ақмола, Олмаота, Ақтўбе, Шарқий Қозоғистон, Қарағанда, Қўстанай, Павлодар, Шимолий Қозоғистон вилоятларида 111 та йўл участкаси ёпилган, шундан 52 таси республика, 59 таси вилоят аҳамиятига эга. Йўлларнинг ёпиқ участкаларида аҳолини эвакуация қилиш учун 40 та вақтинчалик иситиш пунктлари тайёрланди. Йўл хизматлари қорни тозалаш ишларини олиб бормоқда», — дейилади вазирлик хабарида.
Қайд этилишича, Қозоғистоннинг кўплаб вилоятларида икки кундан буён кучли шамол эсмоқда, қор ёғмоқда, баъзи жойларда қор бўрони кузатилмоқда. Шамол томларни йиртиб учириб, дарахтларни қулатмоқда, маҳаллий электр таъминотида узилишлар содир бўлмоқда. Нур-Султон, Олмаота шаҳри ва Олмаота вилоятида юз берган табиий офат натижасида 6 киши, жумладан, уч бола жабрланган. Олмаотада қулаган дарахтлар 25 та машинага зарар етказган.
29 март куни қор ёғиши ва атрофни кўришнинг ёмонлашуви сабабли Нур-Султон аэропорти фаолияти тўхтатилди. Бугун, 30 март куни аэропорт самолётларни қабул қилиш ва жўнатишни қайта бошлади, бироқ ўнлаб рейслар кечиктирилди. Ижтимоий тармоқларда Олмаота аэропортида кучли шамол SCAT авиакомпаниясининг Boeing-737 самолётини қандай буриб юборгани акс этган видео тарқалди.
Ноқулай об-ҳаво муносабати билан республика Фавқулодда вазиятлар вазирлигида қатор ҳудудлардаги бўлинмалари билан тезкор штаб тузилиб, ишонч телефони ташкил этилди. Мамлакат бўйлаб қутқарув ишларига Фавқулодда вазиятлар ва Ички ишлар вазирликларининг 550 нафарга яқин ходими, юзлаб техникалар жалб этилган.
«Қазгидромет»нинг хабар беришича, 30 март куни Чимкентдан ташқари, Қозоғистоннинг барча ҳудудларида бўрон ва ёғингарчилик (қор, ёмғир) давом этади, шамол 15-20 метр / секундгача кучаяди. ФВВ фуқароларни зарур эҳтиёт чораларини кўришга — аҳоли пунктлари ўртасида ҳаракатланишни чеклашга, дарахтлар ва беқарор иншоотлардан узоқроқ туришга чақирди.
Изоҳ (0)