Европа иттифоқининг хорижий ишлар бўйича юқори вакили Жозеп Боррелл Россияда ҳукумат, раҳбарият алмашинувини истамаслигини билдирди. Бу ҳақда Еврокомиссиянинг расмий вакили Эрик Мамер маълум қилган, деб ёзмоқда «Интерфакс».
«Еврокомиссия раисининг ўринбосари ва ЕИнинг юқори лавозимдаги вакилининг баёнотида ҳаммаси очиқ-ойдин айтилди. Гап Россия халқининг иродаси ҳамда эркин сайлаш ҳуқуқи билан боғлиқ. Бу масалани улар учун биз ҳал қилмаймиз», – деган Еврокомиссия матбуот котиби Брюсселдаги брифингда.
Мамер АҚШ президенти Жо Байденнинг Россиядаги ҳукумат алмашинуви ҳақидаги мулоҳазалари фонида Борреллнинг ушбу мавзудаги позициясини изоҳлаган. Еврокомиссия вакили ЕИ дипломатияси раҳбарининг баёноти билан танишилса унинг бу борадаги позицияси яққол кўринишини таъкидлаган.
Байден 26 март куни Варшавада Россия раҳбариятини яна бир марта танқид қилган, кейинчалик Путиннинг ҳукумат тепасида қолмаслиги кераклигини билдирган.
Маълум муддат ўтгач АҚШ администрацияси Байденнинг ушбу фикрлари бўйича тушунтириш бериб, Россияда раҳбарият алмашинуви Вашингтон позицияси эмаслигини маълум қилган.
«Президент Байден Путиннинг бошқарув ваколатлари, таъсир доираси қўшни мамлакатларга ўтишига имкон бермаслик кераклигини айтмоқчи бўлган. У Путиннинг Россиядаги бошқарувини шубҳа остига олмаган ва ҳокимият алмашинувини назарда тутмаган», – дея Оқ уй вакилининг сўзларида иқтибос келтирган ғарб ОАВ.
Кремль ҳам Байденнинг шов-шувли баёнотига жавоб қайтарган.
«Мазкур баёнот хавотирларни оширади. Биз АҚШ президентининг бу каби чиқишларини диққат билан кузатяпмиз. Бу ёғига ҳам қайд этамиз ва нима бўлишини кузатамиз», – деган Россия президентининг матбуот котиби Дмитрий Песков.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)