Қирғизистонда диний-экстремистик ва террористик гуруҳларга қарши ўтказилган тадбирда «Ҳизб ут-Таҳрир» гуруҳи етакчиси қўлга олинди. У Қирғизистоннинг жанубий вилоятларида яширин экстремистик тармоқни ташкиллаштирган, деб хабар беради «24.kg».
Қирғизистон Давлат хавфсизлик миллий қўмитаси маълумотларига кўра, қўлга олинган Ш.И. ташкилотнинг Ўзбекистондаги бўлинмаси раҳбари ҳисобланади. У Қирғизистоннинг жанубий вилоятлари ва Ўзбекистоннинг чегарадош вилоятларида фаолияти тақиқланган ташкилот тузилмаларини яратиш ва мустаҳкамлаш бўйича ўзининг ҳамфикрлари билан яширин фаолият олиб борган.
Судгача бўлган тезкор-суриштирув тадбирлари давомида ушбу эркак 10 йилдан ортиқ вақтдан бери Ўзбекистонда расман қидирувда экани ва Қирғизистонга яширинишга урингани аниқланган. Қирғизистон Давлат хавфсизлик миллий қўмитаси уни Ўзбекистонга экстрадиция қилган.
Аввалроқ Самарқандда «Ҳизб ут-Таҳрир» ғоявий раҳнамоларидан бирининг кўрсатмаларини бажариб келган шахс қўлга олингани, Тошкент шаҳри ва Тошкент вилоятида экстремистик ташкилотларга алоқадор 24 нафар шахс ушлангани тўғрисида хабар берилганди.
Изоҳ (0)