Sog‘liqni saqlash katta soha, bu soha bo‘yicha muhim hujjatlar qabul qilinib, zarur vazifalar belgilangan, katta mablag‘lar ajratilgan. Asosiy maqsad — mahallalarda, xonadonlarda tibbiy xizmat sifatini yaxshilash. Joylarda bu maqsadga erishilyaptimi? Muammolar vaqtida hal etilyaptimi? Xalq salomatligi uchun muhim bo‘lgan loyihalar oxiriga yetkazilyaptimi? Odamlar hayotida real o‘zgarish bormi-yo‘qmi?
O‘zbekiston Xalq demokratik partiyasi sog‘liqni saqlash tizimidagi islohotlarni hayotga izchil tatbiq etish, bu borada parlament va deputatlik nazoratini tizimli yo‘lga qo‘yish maqsadida qator vazifalarni belgilab oldi.
Oliy Majlis Qonunchilik palatasidagi Xalq demokratik partiyasi fraksiyasi joriy yilning fevral oyida bir guruh deputatlar, xalq deputatlari kengashlari bilan birga, oilaviy shifokorlik punktlari va oilaviy poliklinikalar faoliyatini joylarga chiqib o‘rgandi.
O‘rganish jarayonida O‘zbekiston Respublikasi Prezidentining 2020-yil 12-noyabrdagi “Birlamchi tibbiy-sanitariya yordami muassasalari faoliyatiga mutlaqo yangi mexanizmlarni joriy qilish va sog‘liqni saqlash tizimida olib borilayotgan islohotlar samaradorligini yanada oshirish chora-tadbirlar to‘g‘risida”gi farmonining 4-bandi ijrosi, ya’ni 2021-yilda tashkil etilishi belgilangan 100 ta oilaviy shifokorlik punkti (OShP), 28 ta oilaviy poliklinikaning (OP) faoliyatiga alohida e’tibor qaratildi.
Monitoring davrida aniqlanishicha, 100 tadan 96 ta oilaviy shifokor punkti ishga tushgan bo‘lib, qolgan 4 tasi ishga tushirilmagan. Xususan, Qoraqalpog‘iston Respublikasida 2 ta — Bo‘zatov tumani “Aq yeden” oilaviy shifokorlik punkti hamda Mo‘ynoq tumani “Qizil jar” oilaviy shifokorlik punkti faoliyati yo‘lga qo‘yilmagan. Shuningdek, Andijon viloyati Asaka tumanidagi “Mehnatobod”, Namangan viloyati Chortoq tumanidagi “Soz-soy” oilaviy shifokorlik punkti turli sabablar bilan ishga tushmagan.
Umuman olganda, rejalashtirilgan 28 ta oilaviy poliklinikaning 27 tasi ishga tushirilgan bo‘lib, 1 tasining (Namangan viloyati Davlatobod tumanidagi 17-oilaviy poliklinika qurilish ishlari oxiriga yetkazilmaganligi sababli) faoliyati yo‘lga qo‘yilmagan.
Oilaviy poliklinikalarning 13 tasi ta’mirlangan, 14 tasi ta’mirtalab holatda bo‘lsa, oilaviy shifokorlik punktlarining 56 tasi ta’mirlangan, 36 tasi ta’mirtalab holatda, 4 tasida esa qurilish ishlari yakunlanmagan. Oilaviy poliklinikalarning 8 tasi tibbiy asbob-uskunalar bilan to‘liq ta’minlangan, 20 tasi qisman, oilaviy shifokorlik punktlarining 33 tasi tibbiy asbob-uskunalar bilan ta’minlangan, 63 tasida tibbiy asbob-uskunalarga ehtiyoj bor.
O‘rganilgan tibbiyot muassasalarining qariyb 50 foizida kadrlarga ehtiyoji borligi ma’lum bo‘lgan. Deputatlar o‘rganishlar davomida aniqlangan boshqa holatlar bo‘yicha ham Sog‘liqni saqlash vazirligiga tahliliy ma’lumotlarni taqdim etdi. Sog‘liqni saqlash sohasining quyi tizimida amalga oshirilayotgan muhim ishlar e’tirof etilgan holda aniqlangan kamchiliklarni, sa’y-harakatlarni birlashtirish orqali bartaraf etish taklif etildi.
Turli sabablar bilan faoliyati yo‘lga qo‘yilmagan oilaviy shifokorlik punktlari va oilaviy poliklinikalar faoliyatini samarali tashkil etish, parlament va deputatlik nazoratini kuchaytirish bo‘yicha choralar belgilandi.
Xalq demokratik partiyasi faqat monitoring o‘tkazish bilan cheklanib qolmaydi. O‘rganish tibbiyot sohasi bo‘yicha parlament va deputatlik nazoratini kuchaytirish yo‘lidagi dastlabki tadbirlardan biri hisoblanadi. Keyingi nazorat tadbirlari reja asosida izchil davom ettiriladi.
XDP deputatlari jarayonda faol qatnashadi
O‘zbekiston Respublikasi Prezidentining 2022-yil 7-martdagi “Oila va xotin-qizlarni tizimli qo‘llab-quvvatlashga doir ishlarni yanada jadallashtirish chora-tadbirlari to‘g‘risida”gi farmoni ijrosi yuzasidan partiya tashkilotlari va deputatlik birlashmalarining oldida turgan ustuvor vazifalar ham belgilab olingan.
Xususan:
- qishloq joylaridagi ayollarni kasbga o‘qitish, tadbirkorlikka jalb qilish va ish bilan ta’minlash, jumladan, xotin-qizlarga o‘z tomorqasida gul va meva-sabzavot yetishtirish uchun issiqxona qurish, chorvachilik, parrandachilik, baliqchilik va asalarichilikni yo‘lga qo‘yish uchun tijorat banklari tomonidan imtiyozli kreditlar ajratilishi holati yuzasidan deputatlik va jamoatchilik nazoratini o‘rnatish;
- mahallalarda xotin-qizlarning bandligini ta’minlash va salomatligini mustahkamlash maqsadida tikuvchilik, qandolatchilik, fitnes, sheyping, xotin-qizlarni kasbga o‘qitish markazlari faoliyatini yo‘lga qo‘yish maqsadida, mahalliy budjetdan mablag‘lar ajralishi masalasini Xalq deputatlari mahalliy kengashlar sessiyalarida ko‘rib borish;
- oila va xotin-qizlar davlat qo‘mitasi bilan hamkorlikda, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan 150 nafardan jami 2100 nafar ijtimoiy ehtiyojmand oila vakillari, yetim yoki ota-onasining qaramog‘idan mahrum bo‘lgan talaba xotin-qizlar ro‘yxatini mahallalarda shakllantirishda deputat sifatida bevosita ishtirok etish;
- har chorakda xalq deputatlari mahalliy kengashlari sessiyalarida farmon ijrosi yuzasidan mas’ul tashkilotlar rahbarlarining axborotlarini eshitib borish tizimini yo‘lga qo‘yish;
- oila va xotin-qizlar davlat qo‘mitasi viloyat, tuman, shahar hududiy bo‘limlari rahbarlarini oliy ma’lumotga ega bo‘lmagan xotin-qizlarni davlat oliy ta’lim muassasalarining bakalavriat ta’lim yo‘nalishlariga to‘lov-kontrakt asosida o‘qishga tavsiyalar berilishining shaffofligini ta’minlash maqsadida, mahalliy kengash sessiyalarida hisobotlarini eshitib borish;
- oliy ta’lim muassasalari, texnikum va kollejlarda, shu jumladan, sirtqi va kechki ta’lim shaklida o‘qiyotgan xotin-qizlarga tijorat banklari tomonidan davlat budjetidan har yili ajratilishi belgilangan resurs mablag‘larini maqsadli ishlatilish ustidan deputatlik nazoratini o‘rnatish;
- xalq deputatlari mahalliy kengash sessiyalari viloyat, tuman, shahar hokimlarini “Ayollar daftari”, “Yoshlar daftari” va “Temir daftar”ga kiritilgan, yetim yoki ota-onasining qaramog‘idan mahrum bo‘lgan, voyaga yetgan uy-joyga muhtoj xotin-qizlarni ijtimoiy uy-joy bilan ta’minlash masalasida amalga oshirayotgan ishlari xususida hisobotlarini eshitib borish tizimini muntazam yo‘lga qo‘yish belgilangan.
Izoh (0)