Соғлиқни сақлаш катта соҳа, бу соҳа бўйича муҳим ҳужжатлар қабул қилиниб, зарур вазифалар белгиланган, катта маблағлар ажратилган. Асосий мақсад — маҳаллаларда, хонадонларда тиббий хизмат сифатини яхшилаш. Жойларда бу мақсадга эришиляптими? Муаммолар вақтида ҳал этиляптими? Халқ саломатлиги учун муҳим бўлган лойиҳалар охирига етказиляптими? Одамлар ҳаётида реал ўзгариш борми-йўқми?
Ўзбекистон Халқ демократик партияси соғлиқни сақлаш тизимидаги ислоҳотларни ҳаётга изчил татбиқ этиш, бу борада парламент ва депутатлик назоратини тизимли йўлга қўйиш мақсадида қатор вазифаларни белгилаб олди.
Олий Мажлис Қонунчилик палатасидаги Халқ демократик партияси фракцияси жорий йилнинг февраль ойида бир гуруҳ депутатлар, халқ депутатлари кенгашлари билан бирга, оилавий шифокорлик пунктлари ва оилавий поликлиникалар фаолиятини жойларга чиқиб ўрганди.
Ўрганиш жараёнида Ўзбекистон Республикаси Президентининг 2020 йил 12 ноябрдаги «Бирламчи тиббий-санитария ёрдами муассасалари фаолиятига мутлақо янги механизмларни жорий қилиш ва соғлиқни сақлаш тизимида олиб борилаётган ислоҳотлар самарадорлигини янада ошириш чора-тадбирлар тўғрисида»ги фармонининг 4-банди ижроси, яъни 2021 йилда ташкил этилиши белгиланган 100 та оилавий шифокорлик пункти (ОШП), 28 та оилавий поликлиниканинг (ОП) фаолиятига алоҳида эътибор қаратилди.
Мониторинг даврида аниқланишича, 100 тадан 96 та оилавий шифокор пункти ишга тушган бўлиб, қолган 4 таси ишга туширилмаган. Хусусан, Қорақалпоғистон Республикасида 2 та — Бўзатов тумани «Ақ еден» оилавий шифокорлик пункти ҳамда Мўйноқ тумани «Қизил жар» оилавий шифокорлик пункти фаолияти йўлга қўйилмаган. Шунингдек, Андижон вилояти Асака туманидаги «Меҳнатобод», Наманган вилояти Чортоқ туманидаги «Соз-сой» оилавий шифокорлик пункти турли сабаблар билан ишга тушмаган.
Умуман олганда, режалаштирилган 28 та оилавий поликлиниканинг 27 таси ишга туширилган бўлиб, 1 тасининг (Наманган вилояти Давлатобод туманидаги 17-оилавий поликлиника қурилиш ишлари охирига етказилмаганлиги сабабли) фаолияти йўлга қўйилмаган.
Оилавий поликлиникаларнинг 13 таси таъмирланган, 14 таси таъмирталаб ҳолатда бўлса, оилавий шифокорлик пунктларининг 56 таси таъмирланган, 36 таси таъмирталаб ҳолатда, 4 тасида эса қурилиш ишлари якунланмаган. Оилавий поликлиникаларнинг 8 таси тиббий асбоб-ускуналар билан тўлиқ таъминланган, 20 таси қисман, оилавий шифокорлик пунктларининг 33 таси тиббий асбоб-ускуналар билан таъминланган, 63 тасида тиббий асбоб-ускуналарга эҳтиёж бор.
Ўрганилган тиббиёт муассасаларининг қарийб 50 фоизида кадрларга эҳтиёжи борлиги маълум бўлган. Депутатлар ўрганишлар давомида аниқланган бошқа ҳолатлар бўйича ҳам Соғлиқни сақлаш вазирлигига таҳлилий маълумотларни тақдим этди. Соғлиқни сақлаш соҳасининг қуйи тизимида амалга оширилаётган муҳим ишлар эътироф этилган ҳолда аниқланган камчиликларни, саъй-ҳаракатларни бирлаштириш орқали бартараф этиш таклиф этилди.
Турли сабаблар билан фаолияти йўлга қўйилмаган оилавий шифокорлик пунктлари ва оилавий поликлиникалар фаолиятини самарали ташкил этиш, парламент ва депутатлик назоратини кучайтириш бўйича чоралар белгиланди.
Халқ демократик партияси фақат мониторинг ўтказиш билан чекланиб қолмайди. Ўрганиш тиббиёт соҳаси бўйича парламент ва депутатлик назоратини кучайтириш йўлидаги дастлабки тадбирлардан бири ҳисобланади. Кейинги назорат тадбирлари режа асосида изчил давом эттирилади.
ХДП депутатлари жараёнда фаол қатнашади
Ўзбекистон Республикаси Президентининг 2022 йил 7 мартдаги «Оила ва хотин-қизларни тизимли қўллаб-қувватлашга доир ишларни янада жадаллаштириш чора-тадбирлари тўғрисида»ги фармони ижроси юзасидан партия ташкилотлари ва депутатлик бирлашмаларининг олдида турган устувор вазифалар ҳам белгилаб олинган.
Хусусан:
- қишлоқ жойларидаги аёлларни касбга ўқитиш, тадбиркорликка жалб қилиш ва иш билан таъминлаш, жумладан, хотин-қизларга ўз томорқасида гул ва мева-сабзавот етиштириш учун иссиқхона қуриш, чорвачилик, паррандачилик, балиқчилик ва асаларичиликни йўлга қўйиш учун тижорат банклари томонидан имтиёзли кредитлар ажратилиши ҳолати юзасидан депутатлик ва жамоатчилик назоратини ўрнатиш;
- маҳаллаларда хотин-қизларнинг бандлигини таъминлаш ва саломатлигини мустаҳкамлаш мақсадида тикувчилик, қандолатчилик, фитнес, шейпинг, хотин-қизларни касбга ўқитиш марказлари фаолиятини йўлга қўйиш мақсадида, маҳаллий бюджетдан маблағлар ажралиши масаласини Халқ депутатлари маҳаллий кенгашлар сессияларида кўриб бориш;
- оила ва хотин-қизлар давлат қўмитаси билан ҳамкорликда, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан 150 нафардан жами 2100 нафар ижтимоий эҳтиёжманд оила вакиллари, етим ёки ота-онасининг қарамоғидан маҳрум бўлган талаба хотин-қизлар рўйхатини маҳаллаларда шакллантиришда депутат сифатида бевосита иштирок этиш;
- ҳар чоракда халқ депутатлари маҳаллий кенгашлари сессияларида фармон ижроси юзасидан масъул ташкилотлар раҳбарларининг ахборотларини эшитиб бориш тизимини йўлга қўйиш;
- оила ва хотин-қизлар давлат қўмитаси вилоят, туман, шаҳар ҳудудий бўлимлари раҳбарларини олий маълумотга эга бўлмаган хотин-қизларни давлат олий таълим муассасаларининг бакалавриат таълим йўналишларига тўлов-контракт асосида ўқишга тавсиялар берилишининг шаффофлигини таъминлаш мақсадида, маҳаллий кенгаш сессияларида ҳисоботларини эшитиб бориш;
- олий таълим муассасалари, техникум ва коллежларда, шу жумладан, сиртқи ва кечки таълим шаклида ўқиётган хотин-қизларга тижорат банклари томонидан давлат бюджетидан ҳар йили ажратилиши белгиланган ресурс маблағларини мақсадли ишлатилиш устидан депутатлик назоратини ўрнатиш;
- халқ депутатлари маҳаллий кенгаш сессиялари вилоят, туман, шаҳар ҳокимларини «Аёллар дафтари», «Ёшлар дафтари» ва «Темир дафтар»га киритилган, етим ёки ота-онасининг қарамоғидан маҳрум бўлган, вояга етган уй-жойга муҳтож хотин-қизларни ижтимоий уй-жой билан таъминлаш масаласида амалга ошираётган ишлари хусусида ҳисоботларини эшитиб бориш тизимини мунтазам йўлга қўйиш белгиланган.
Изоҳ (0)