O‘zbekistonda soliq huquqbuzarliklari haqida xabar bergan 15 kishiga 9 mln so‘m mukofot berildi

O‘zbekistonda soliq huquqbuzarligi haqida ogohlantirgan iste’molchilar mukofotlanishi haqida xabar berilgan edi. Davlat soliq qo‘mitasi 1-yanvardan 4-fevralga qadar “Soliq hamkor” orqali yo‘llagan murojaatlari o‘z tasdig‘ini topgan fuqarolarga jami 17,5 million so‘m mukofot tayinlanganini ma’lum qildi.

Qo‘mita xabariga ko‘ra, ayni paytda 15 nafar fuqaroga 9 million so‘m mukofot to‘lab berildi.

2022-yil 1-yanvardan soliq huquqbuzarliklari haqida “Soliq” mobil ilovasining “Soliq hamkor“ bo‘limi orqali xabar bergan fuqarolarga huquqbuzarlardan undirilgan jarima summasining 20 foizi miqdorida mukofot to‘lanishi belgilangan.

Fuqarolar “Soliq hamkor” orqali:

• chek bermaslik;
• bank plastik kartasi orqali to‘lovni qabul qilishni rad etish;
• bank plastik kartasi orqali to‘lov amalga oshirilganda mahsulotni qimmat sotish;
• noqonuniy tadbirkorlik faoliyati;
• markirovkalanishi kerak bo‘lgan mahsulotni markirovkasiz (yoki qalbaki markirovka bilan) sotish va shu kabi soliq huquqbuzarliklari haqida xabar berishi mumkin.

Yo‘llangan murojaat soliq organlari tomonidan o‘rganilib, o‘z tasdig‘ini topgan taqdirda, huquqbuzardan undirilgan jarima summasining 20 foizi mukofot sifatida murojaatchiga taqdim etiladi.