Saudiya Arabistoni boshchiligidagi koalitsiya 26-mart kuni Yamandagi isyonchi xusiylarga qarshi harbiy operatsiyani boshladi. Operatsiyadan maqsad neft obyektlariga hujumlarni to‘xtatish, deb xabar beradi “Interfaks”.
“Neft obyektlari yoki energetika xavfsizligiga ta’sirlarni zararsizlantirish bo‘yicha operatsiya boshlandi”, — deyiladi xabarda. Operatsiya, shuningdek, “global energiya manbalarini va yetkazib berish zanjirini himoya qilish”ga qaratilgan.
Ta’kidlanishicha, operatsiya hozirda dastlabki bosqichda bo‘lib, yamanlik xusiylar o‘zlarining “dushmanona harakatlari”ni his qilishlari kerak. Koalitsiya “bevosita tahdid manbalari bilan kurashadi” va fuqarolardan neft obyektlari yoki Xodeyda port shahridagi obyektlarga yaqinlashmaslikni so‘ragan.
Xusiylarga bog‘liq Al-Masira telekanalining ma’lum qilishicha, koalitsiyaning harbiy samolyotlari Xodeyda shahridagi elektr energiya korporatsiyasi va neft obyektlari ustidan uchib o‘tgan.
Al-Ekbariya telekanali ma’lumotlariga ko‘ra esa Saudiya Arabistoni Sano va Xodeyda shaharlaridagi “tahdid o‘choqlari”ga aviazarbalarni amalga oshirgan.
Avvalroq Saudi Aramco kompaniyasining neft bazasiga uyushtirilgan hujum oqibatida yirik yong‘in yuzaga kelgandi. Xusiylar hujum uchun mas’uliyatni o‘z bo‘yniga olgan. Yamanlik isyonchilar o‘tgan hafta oxirida ham Saudiya Arabistoniga hujum uyushtirgan edi. O‘shanda xusiylar Jiddadagi neft saqlanadigan rezervuarlar va neft mahsulotlariga hujum qilgan.
Yamandagi qurolli mojaro 2014-yilning martidan beri davom etmoqda. Saudiya Arabistoni boshchiligidagi arab koalitsiyasi Yaman prezidenti Abdu Rabbo Mansur Hodiy qo‘shinlarini mamlakatning bir qismini nazorat qilayotgan xusiy isyonchilarga qarshi kurashda qo‘llab-quvvatlamoqda. G‘arbning fikricha, isyonchilarga Eron yordam bermoqda.
Izoh (0)