Саудия Арабистони бошчилигидаги коалиция 26 март куни Ямандаги исёнчи хусийларга қарши ҳарбий операцияни бошлади. Операциядан мақсад нефть объектларига ҳужумларни тўхтатиш, деб хабар беради «Интерфакс».
«Нефть объектлари ёки энергетика хавфсизлигига таъсирларни зарарсизлантириш бўйича операция бошланди», — дейилади хабарда. Операция, шунингдек, «глобал энергия манбаларини ва етказиб бериш занжирини ҳимоя қилиш»га қаратилган.
Таъкидланишича, операция ҳозирда дастлабки босқичда бўлиб, яманлик хусийлар ўзларининг «душманона ҳаракатлари»ни ҳис қилишлари керак. Коалиция «бевосита таҳдид манбалари билан курашади» ва фуқаролардан нефть объектлари ёки Ходейда порт шаҳридаги объектларга яқинлашмасликни сўраган.
Хусийларга боғлиқ Al-Masira телеканалининг маълум қилишича, коалициянинг ҳарбий самолётлари Ходейда шаҳридаги электр энергия корпорацияси ва нефть объектлари устидан учиб ўтган.
Al-Ekbariya телеканали маълумотларига кўра эса Саудия Арабистони Сано ва Ходейда шаҳарларидаги «таҳдид ўчоқлари»га авиазарбаларни амалга оширган.
Аввалроқ Сауди Арамcо компаниясининг нефть базасига уюштирилган ҳужум оқибатида йирик ёнғин юзага келганди. Хусийлар ҳужум учун масъулиятни ўз бўйнига олган. Яманлик исёнчилар ўтган ҳафта охирида ҳам Саудия Арабистонига ҳужум уюштирган эди. Ўшанда хусийлар Жиддадаги нефть сақланадиган резервуарлар ва нефть маҳсулотларига ҳужум қилган.
Ямандаги қуролли можаро 2014 йилнинг мартидан бери давом этмоқда. Саудия Арабистони бошчилигидаги араб коалицияси Яман президенти Абду Раббо Мансур Ҳодий қўшинларини мамлакатнинг бир қисмини назорат қилаётган хусий исёнчиларга қарши курашда қўллаб-қувватламоқда. Ғарбнинг фикрича, исёнчиларга Эрон ёрдам бермоқда.
Изоҳ (0)