Saudiya Arabistoni va uning ittifoqchilari Yaman hududiga, xususan, mamlakat poytaxti Sano shahriga yana hujum uyushtirdi. Bu haqda Mehr agentligi xabar berdi.

Foto: Mehr news

Xabarga ko‘ra, koalitsiya qiruvchi samolyotlari Sanoning Al-Sabin okrugidagi An-Nahdin va Al-Xafa tumanlariga besh marta zarba yo‘llagan, shuningdek, Sano chekkasidagi Faj Attan tumaniga hujum qilgan.

Bundan tashqari, Saudiya qiruvchi samolyotlari Sanxan okrugidagi Jarbon tumaniga uch marta, Arhab tumaniga ikki marta havo hujumi uyushtirgan, Havlandagi Al-Xosn tumaniga ikkita zarba tashlab, telekommunikatsiya tarmog‘ini yo‘q qilgan.

Foto: Telegram

Foto: Telegram

Foto: Telegram

Havo hujumlarining qurbonlari haqida hozircha ma’lumot yo‘q. Yamanda bir haftadan beri internet uzilgan, chunki zarbalar natijasida Xodeydadagi telekommunikatsiya markazi vayron qilingan.

Eslatib o‘tamiz, arab koalitsiyasi 11-yanvar kuni Yamanni ozod qilish bo‘yicha harbiy operatsiyani boshlagan edi. “Yamanda xavfsizlikni tiklash maqsadida” keng ko‘lamli harbiy operatsiyalar o‘tkazilmoqda. Yanvar o‘rtalarida koalitsiyaning Yaman poytaxtiga yo‘llagan zarbalari oqibatida kamida 23 kishi halok bo‘lgani xabar qilingandi. Halok bo‘lganlar orasida ayollar va bolalar ham bor.

Avvalroq Yamanning Marib shahriga amalga oshirilgan raketa zarbalari oqibatida 29 kishi halok bo‘lgani to‘g‘risida xabar berilgan.

Yamandagi mojarolar 2014-yildan beri davom etmoqda. Harbiy ziddiyatlar 2015-yilning mart oyida Saudiya Arabistoni boshchiligidagi koalitsiya kuchlarining respublika prezidenti Mansur Hodiy tarafiga kelib qo‘shilganidan so‘ng kuchaydi. Ularga Eron tomonidan qo‘llab-quvvatlanayotgan “Ansar Alloh” harakati tarkibiga kiruvchi yamanlik isyonchilar qarshilik ko‘rsatmoqda.