25-mart kuni Nur-Sulton shahrida mamlakat bosh muftiysi Navro‘zbay Tag‘anuli raisligida Qozog‘iston musulmonlari idorasi prezidium yig‘ilishi o‘tkazildi. Bu haqda qo‘shni mamlakat Musulmonlar idorasi matbuot xizmati xabar berdi.
Yig‘ilishda Qozog‘iston musulmonlari idorasi 2022-yildagi Ramazon oyi 2-apreldan boshlanib, 2-mayga qadar davom etishini e’lon qilgan.
Qozog‘iston muftiysining o‘rinbosari, shariat va fatvo bo‘limi boshlig‘i Sansizbay Qurbono‘g‘lining ma’lum qilishicha, Ramazon oyining boshlanishiga doir qaror O‘zbekiston va Qirg‘iziston muftiyatlari bilan kelishuv asosida qabul qilingan. “Zakot va xayriya” fondi direktori Kanat Kidirmin muftiyga Ramazon oyida o‘tkaziladigan xayriya aksiyalari to‘g‘risida hisobot bergan.
Shuningdek, Qozog‘iston muftiyati Ramazon hayiti 2-may sanasida nishonlanishini ma’lum qilgan.
Eslatib o‘tamiz, 2021-yilda O‘zbekistonda Ramazon oyi 13-apreldan boshlangan, mamlakatdagi 1400 ga yaqin masjidda Qur’oni karim xatm qilingan edi.
Mavzuga doir: “Ramazon oyida Umra narxi oshadi” — Musulmonlar idorasi
Izoh (0)