Kanada Ukrainadagi urush tufayli Rossiya federatsiya kengashining 160 nafar a’zosiga qarshi sanksiyalar joriy qiladi. Bu haqda Kanada bosh vaziri Jastin Tryudoning matbuot xizmati xabar bergan.
Bosh vazir cheklov choralari haqida g‘arb mamlakatlarining rahbarlari, YI, NATO vakillari ishtirokida Bryusselda o‘tgan G7 “Katta yettilik” davlatlarining sammitida ma’lum qilgan.
“Ukrainaning hududiy yaxlitligi, suverenitetiga, mustaqilligiga nisbatan tajovuzlar tufayli Rossiya federatsiya kengashining 160 nafar a’zosiga qarshi iqtisodiy cheklovlar joriy etildi”, — deyiladi xabarda.
Shuningdek, Kanada yaqin kunlar ichida Rossiyaga tovar eksporti va texnologiyalarni yetkazib berish yuzasidan yangi qo‘shimcha sanksiyalar e’lon qilishi kutilmoqda.
Bundan tashqari Kanada Ukraina va unga qo‘shni mamlakatlarga, xususan, Moldovaga, BMT, Qizil hoch tuzilmalari hamda boshqa tashkilotlarga ijtimoiy yordamning navbatdagi 50 million dollarlik transhini yuboradi, deyilgan Kanada bosh vaziri matbuot xizmatining axborotida. Kanada Ukraina madaniy meros obyektlarini himoya qilish uchun YUNESKOga 4,8 million dollar miqdorida mablag‘ ajratadi.
Avval Yevropa ittifoqi Donetsk va Lugansk xalq respublikalari mustaqilligini tan olish haqidagi kelishuvlarni ratifikatsiya qilgan Rossiya davlat dumasi va Federatsiya kengashi vakillariga nisbatan sanksiyalar qo‘llagandi. Rossiya 24-fevralda Ukraina hududida maxsus harbiy operatsiyalarni boshlaganidan keyin YI, AQSH, Buyuk Britaniya, Kanada, Yaponiya, Janubiy Koreya, Avstraliya va boshqa davlatlar rossiyalik biznesmenlar, top-menejerlar, siyosatchilar va amaldorlarga nisbatan bir qator taqiq hamda cheklov paketlarini joriy etgan.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)