БМТ Хавфсизлик кенгаши Россиянинг Украинадаги гуманитар вазият бўйича резолюциясини қабул қилмади

БМТ Хавфсизлик кенгаши Россиянинг Украинадаги гуманитар вазият бўйича резолюциясини қабул қилмади, деб хабар беради Anadolu агентлиги.

Россиянинг Украинадаги гуманитар вазият бўйича резолюциясига фақат Хитой овоз берган, Хавфсизлик кенгашининг қолган 13 аъзоси бетараф қолган. Шу сабабли Россия резолюцияси керакли 9 та овозни тўплай олмай, рад этилган.

БМТ Хавфсизлик кенгаши Украинадаги гуманитар вазиятни кўриб чиқиш учун йиғилиш белгилашга уринган, бироқ Россия бунга рози бўлмаган ва ўз резолюцияси лойиҳасини киритган.

Резолюцияда гуманитар вазиятнинг ёмонлашгани таъкидланган, бироқ вазият Россиянинг Украинага қарши босқинидан сўнг юзага келгани кўрсатилмаган.

Резолюция қабул қилиниши учун БМТ Хавфсизлик кенгашининг 5 та доимий ва 10 та доимий бўлмаган жами 15 та аъзосининг камида 9 нафари қўллаб-қувватлаши керак. Шу билан бирга, доимий аъзолардан ҳеч бири вето ҳуқуқидан фойдаланмаслиги лозим.

БМТ Бош Ассамблеяси яқин кунларда Россиянинг Украинага нисбатан тажовузкорлигини қораловчи резолюцияни муҳокамага тақдим этади, бу эса Россияни дипломатик изоляция қилишни назарда тутади.

Аввалроқ АҚШ президенти Жо Байден Европага жўнаб кетаётгани, у ерда НАТО ва G7 етакчиларининг саммитида иштирок этиб, Европа Иттифоқи етакчилари олдида нутқ сўзлаши тўғрисида хабар берилганди. Байденнинг сафаридан бош мақсад Ғарбнинг Украинадаги вазиятга кейинги муносабатини мувофиқлаштиришдир.