Shavkat Mirziyoyev 23-mart kuni Tatariston prezidenti Rustam Minnixanov boshchiligidagi Rossiya delegatsiyasini qabul qildi. Bu haqda Prezident matbuot xizmati xabar qildi.
Qayd etilishicha, O‘zbekiston hududlarining Tatariston bilan o‘zaro manfaatli hamkorligini kengaytirishning amaliy jihatlari ko‘rib chiqilgan. Ilgari erishilgan kelishuvlarga muvofiq ikki mamlakat yetakchi korxonalari o‘rtasida sheriklik aloqalari va kooperatsiya rivojlanayotganining ilk muhim natijalari qayd etilgan.
“O‘zaro savdo hajmi ortib, nomenklaturasi sifatli kengaymoqda, qator investitsiya loyihalari amalga oshirilmoqda. Bugun Toshkent viloyatida yangi ‘Chirchiq’ texnologik parki qo‘shma loyihasiga start berildi. Gumanitar yo‘nalishda, shu jumladan, ta’lim va madaniyat sohalarida muhim dasturlar amalga oshirilmoqda”, — deyiladi xabarda.
Uchrashuvda sanoat kooperatsiyasi, axborot texnologiyalari, transport va logistika, farmatsevtika va turizm sohalarida loyihalarni yanada ilgari surishga alohida e’tibor qaratilgan. Turli darajalardagi faol muloqotlarni va “yo‘l xaritasi” asosida birgalikdagi ishlarni davom ettirishga kelishib olingan.
Eslatib o‘tamiz, 22-mart kuni kechqurun Tatariston prezidenti Rustam Minnixanov ishchi tashrif bilan O‘zbekistonga kelgan. Toshkent xalqaro aeroportida uni Rossiyaning O‘zbekistondagi elchisi Oleg Malginov va O‘zbekiston bosh vazir o‘rinbosari — investitsiyalar va tashqi savdo vaziri Sardor Umurzoqov kutib olgan.
23-mart kuni Minnixanov O‘zbekiston hukumatining qator vakillari bilan muzokaralar o‘tkazishi kerak. Minnixanov mamlakatga tashrifi davomida Tataristonning “Ximgrad” texnopolisi bilan hamkorlikda “Chirchiq” kimyo-industrial texnoparkini tashkil etilishi munosabati bilan o‘tkazilayotgan marosimda bosh vazir Abdulla Aripov bilan qurilishga tamal toshini qo‘ydi. Texnoparkda 23-mart kuni Toshkent shahar hokimligi va Tatariston respublikasi hukumati o‘rtasida hamkorlik yuzasidan “yo‘l xarita”si imzolandi.
Izoh (0)