Shavkat Mirziyoyev 24-mart kuni Toshkent xalqaro investitsiya forumida ishtirok etib, forumning yalpi sessiyasida nutq so‘zlaydi. Bu haqda Prezident matbuot kotibi Sherzod Asadov xabar qildi.
Qayd etilishicha, tadbirda Yevropa tiklanish va taraqqiyot banki prezidenti Odil-Reno Basso, Osiyo taraqqiyot banki prezidenti Masatsugu Asakava, Saudiya Arabistoni podshohligi investitsiyalar vaziri Xolid al-Falih, Jahon savdo tashkiloti vitse-prezidenti Syanchen Chjan, Osiyo infratuzilmaviy investitsiyalar banki vitse-prezidenti Konstantin Limitovskiy, Xalqaro moliya korporatsiyasi vitse-prezidenti Stefani fon Friderburg ham qatnashadi.
Prezident ishtirokidagi sessiyada BBC World News xalqaro telekanalida yangiliklar boshlovchisi sifatida tanilgan, hozirda esa YTTB kommunikatsiya masalalari bo‘yicha direktori lavozimida faoliyat yuritayotgan Jonatan Charlz moderatorlik qiladi.
23-mart kuni esa davlat rahbari Tatariston prezidenti Rustam Minnixanov boshchiligidagi Rossiya delegatsiyasini qabul qiladi.
Ma’lumot uchun, Ushbu forum 24—26-mart kunlariga rejalashtirilgan bo‘lib, unda xalqaro tashkilotlar va moliyaviy tuzilmalar, 56 ta davlatdan 1 ming 500 nafardan ziyod yirik investorlar va yuqori martabali mehmonlar qatnashishi kutilmoqda. Xususan, Yevropa tiklanish va taraqqiyot banki, Osiyo taraqqiyot banki prezidentlari, vazirlar, yirik korporatsiya va kompaniyalar rahbarlari ishtirok etadi.
Shavkat Mirziyoyev 10-mart kuni Toshkent xalqaro investitsiya forumiga tayyorgarlik masalalari yuzasidan yig‘ilish o‘tkazgandi. Davlat rahbari bunday investitsiya forumi O‘zbekistonda birinchi marta o‘tkazilayotganiga e’tibor qaratib, uni yuqori darajada tashkillashtirish bo‘yicha ko‘rsatmalar berdi.
Izoh (0)