Шавкат Мирзиёев 23 март куни Татаристон президенти Рустам Минниханов бошчилигидаги Россия делегациясини қабул қилди. Бу ҳақда Президент матбуот хизмати хабар қилди.
Қайд этилишича, Ўзбекистон ҳудудларининг Татаристон билан ўзаро манфаатли ҳамкорлигини кенгайтиришнинг амалий жиҳатлари кўриб чиқилган. Илгари эришилган келишувларга мувофиқ икки мамлакат етакчи корхоналари ўртасида шериклик алоқалари ва кооперация ривожланаётганининг илк муҳим натижалари қайд этилган.
«Ўзаро савдо ҳажми ортиб, номенклатураси сифатли кенгаймоқда, қатор инвестиция лойиҳалари амалга оширилмоқда. Бугун Тошкент вилоятида янги ‘Чирчиқ’ технологик парки қўшма лойиҳасига старт берилди. Гуманитар йўналишда, шу жумладан, таълим ва маданият соҳаларида муҳим дастурлар амалга оширилмоқда», — дейилади хабарда.
Учрашувда саноат кооперацияси, ахборот технологиялари, транспорт ва логистика, фармацевтика ва туризм соҳаларида лойиҳаларни янада илгари суришга алоҳида эътибор қаратилган. Турли даражалардаги фаол мулоқотларни ва «йўл харитаси» асосида биргаликдаги ишларни давом эттиришга келишиб олинган.
Эслатиб ўтамиз, 22 март куни кечқурун Татаристон президенти Рустам Минниханов ишчи ташриф билан Ўзбекистонга келган. Тошкент халқаро аэропортида уни Россиянинг Ўзбекистондаги элчиси Олег Малгинов ва Ўзбекистон бош вазир ўринбосари — инвестициялар ва ташқи савдо вазири Сардор Умурзоқов кутиб олган.
23 март куни Минниханов Ўзбекистон ҳукуматининг қатор вакиллари билан музокаралар ўтказиши керак. Минниханов мамлакатга ташрифи давомида Татаристоннинг «Химград» технополиси билан ҳамкорликда «Чирчиқ» кимё-индустриал технопаркини ташкил этилиши муносабати билан ўтказилаётган маросимда бош вазир Абдулла Арипов билан қурилишга тамал тошини қўйди. Технопаркда 23 март куни Тошкент шаҳар ҳокимлиги ва Татаристон республикаси ҳукумати ўртасида ҳамкорлик юзасидан «йўл харита»си имзоланди.
Изоҳ (0)