“Oyligim besh yarim million atrofida, ba’zida undan ham ko‘proq olaman”. Prezident Chiroqchi tumanining chekka hududida ishlaydigan shifokor bilan suhbatlashdi

Toshkentdagi “O‘zbekiston” xalqaro anjumanlar saroyida Shavkat Mirziyoyevning sog‘liqni saqlash sohasi vakillari bilan “O‘zbekiston tibbiyoti — inson qadri uchun” mavzusidagi ochiq muloqoti bo‘lib o‘tdi. Unda asli samarqandlik shifokor Islom G‘aniyev prezident bilan suhbatda bo‘ldi. Mazkur holat “Menimcha” ko‘rsatuvida namoyish etildi.

Islom G‘aniyev “Qishloq shifokori” dasturini qabul qilib, Qashqadaryo viloyati Chiroqchi tumanining Sho‘rquduq qishlog‘iga borib ishlayotganini ta’kidladi. U davlat rahbari bilan muloqot davomida yaxshi gaplarni gapirdi va hammaning yuziga tabassum yugurishiga sababchi bo‘ldi.

“Dasturda belgilgangan 30 million so‘mlik to‘lov mablag‘ini ham respublikada birinchilardan bo‘lib qabul qilib oldim”, — dedi u prezidentga.

Shavkat Mirziyoyev undan qancha oylik olayotganini so‘radi. “Besh yarim million so‘m atrofida, ba’zida undan ham ko‘proq olaman”, — dedi u. Shavkat Mirziyoyev “nima degani u ba’zida?”, deb so‘radi hazil bilan. “Ko‘proq ishlasak, ko‘proq oylik olamiz”, — deya qo‘shimcha qildi Islom G‘aniyev.

Shundan so‘ng barchaning yuziga tabassum yugurdi. “Endi sening ham oyliging o‘zgaradi”, — dedi prezident unga. Islom G‘aniyev davlat rahbari buni o‘z nutqida ta’kidlaganini eslab o‘tdi.

Shavkat Mirziyoyev undan Chiroqchida qolishi yoki Samarqandga qaytib kelishi haqida so‘radi. “Mutaxassislik olib kelib, shu yerda qolaman. Bu yerdan ketish niyatim yo‘q, juda yoqib qoldi, to‘g‘risini aytsam”, — deya savolga javob berdi Islom G‘aniyev.

Prezident bu javobdan so‘ng samimiy tabassum qilib, “ilohim, chiroqchiliklarning yoqqani senga chin bo‘lsin”, — dedi.