Тошкентдаги «Ўзбекистон» халқаро анжуманлар саройида Шавкат Мирзиёевнинг соғлиқни сақлаш соҳаси вакиллари билан «Ўзбекистон тиббиёти — инсон қадри учун» мавзусидаги очиқ мулоқоти бўлиб ўтди. Унда асли самарқандлик шифокор Ислом Ғаниев президент билан суҳбатда бўлди. Мазкур ҳолат «Менимча» кўрсатувида намойиш этилди.
Ислом Ғаниев «Қишлоқ шифокори» дастурини қабул қилиб, Қашқадарё вилояти Чироқчи туманининг Шўрқудуқ қишлоғига бориб ишлаётганини таъкидлади. У давлат раҳбари билан мулоқот давомида яхши гапларни гапирди ва ҳамманинг юзига табассум югуришига сабабчи бўлди.
«Дастурда белгилганган 30 миллион сўмлик тўлов маблағини ҳам республикада биринчилардан бўлиб қабул қилиб олдим», — деди у президентга.
Шавкат Мирзиёев ундан қанча ойлик олаётганини сўради. «Беш ярим миллион сўм атрофида, баъзида ундан ҳам кўпроқ оламан», — деди у. Шавкат Мирзиёев «нима дегани у баъзида?», деб сўради ҳазил билан. «Кўпроқ ишласак, кўпроқ ойлик оламиз», — дея қўшимча қилди Ислом Ғаниев.
Шундан сўнг барчанинг юзига табассум югурди. «Энди сенинг ҳам ойлигинг ўзгаради», — деди президент унга. Ислом Ғаниев давлат раҳбари буни ўз нутқида таъкидлаганини эслаб ўтди.
Маълумот учун, олис ва чекка ҳудудларда фаолият олиб бораётган шифокорларнинг ойлик иш ҳақига 2 миллион сўмдан қўшимча устама тўланади.
Шавкат Мирзиёев ундан Чироқчида қолиши ёки Самарқандга қайтиб келиши ҳақида сўради. «Мутахассислик олиб келиб, шу ерда қоламан. Бу ердан кетиш ниятим йўқ, жуда ёқиб қолди, тўғрисини айтсам», — дея саволга жавоб берди Ислом Ғаниев.
Президент бу жавобдан сўнг самимий табассум қилиб, «илоҳим, чироқчиликларнинг ёққани сенга чин бўлсин», — деди.
Мавзуга доир:
- «Шифокорнинг фарзанди эканлигимдан ғурурланаман» — Шавкат Мирзиёев
- Ўзбекистонда «Халқ саломатлиги посбони» кўкрак нишони таъсис этилади
- «Бу бизга мутлақо ярашмайдиган ҳолат». Шавкат Мирзиёев шифокорга қўл кўтариш ҳолатлари ҳақида гапирди
- Шавкат Мирзиёевнинг соғлиқни сақлаш соҳаси вакиллари билан очиқ мулоқоти — суратларда
Изоҳ (0)