2022-yil 1-apreldan boshlab O‘zbekistondan Qozog‘istonga temiryo‘l qatnovlari bosqichma-bosqich qayta tiklanadi. Bu haqda “O‘zbekiston temir yo‘llari” matbuot xizmati xabar berdi.
“O‘zbekiston temir yo‘llari” aksiyadorlik jamiyati va “Qazaqstan temir joli” MK AJ bilan kelishilgan holda Qozog‘istonga birinchi yo‘lovchi poyezd harakatini tashkil etadi. 2022-yil 1-apreldan boshlab Nukus—Beyneu—Nukus yo‘nalishidagi 647/648-sonli poyezd qatnovi yo‘lga qo‘yiladi.
Ushbu poyezd “Nukus” vokzalidan haftaning har seshanba, juma va yakshanba kunlari va Beyneu stansiyasidan har dushanba, chorshanba va shanba kunlari jo‘natiladi.
Boshqa qo‘shni davlatlar bilan temiryo‘l yo‘nalishlarining qayta tiklanishi tomonlarning kelishuviga asosan bosqichma-bosqich ochilishi kutilmoqda.
Eslatib o‘tamiz, O‘zbekistonda ilk bor koronavirus aniqlangan 2020-yil 16-martdan boshlab temiryo‘l transporti qatnovlari to‘xtatilgan edi. 2020-yilning 15-avgustidan mahalliy avia va temiryo‘l qatnovlari bosqichma-bosqich tiklangan.
Izoh (0)