2022 йил 1 апрелдан бошлаб Ўзбекистондан Қозоғистонга темир йўл қатновлари босқичма-босқич қайта тикланади. Бу ҳақда «Ўзбекистон темир йўллари» матбуот хизмати хабар берди.
«Ўзбекистон темир йўллари» акциядорлик жамияти ва «Қазақстан темир жоли» МК АЖ билан келишилган ҳолда Қозоғистонга биринчи йўловчи поезд ҳаракатини ташкил этади. 2022 йил 1 апрелдан бошлаб Нукус—Бейнеу—Нукус йўналишидаги 647/648-сонли поезд қатнови йўлга қўйилади.
Ушбу поезд «Нукус» вокзалидан ҳафтанинг ҳар сешанба, жума ва якшанба кунлари ва Бейнеу станциясидан ҳар душанба, чоршанба ва шанба кунлари жўнатилади.
Бошқа қўшни давлатлар билан темир йўл йўналишларининг қайта тикланиши томонларнинг келишувига асосан босқичма-босқич очилиши кутилмоқда.
Эслатиб ўтамиз, Ўзбекистонда илк бор коронавирус аниқланган 2020 йил 16 мартдан бошлаб темир йўл транспорти қатновлари тўхтатилган эди. 2020 йилнинг 15 августидан маҳаллий авиа ва темир йўл қатновлари босқичма-босқич тикланган.
Изоҳ (0)