“So‘nggi ikki yilda markazimizga keladigan bemorlar soni kamaydi”. Respublika ixtisoslashtirilgan travmatologiya va ortopediya ilmiy-amaliy tibbiyot markazi rahbari va u yerda davolanayotgan bemor bilan suhbat

Aprel oyining 10-sanasida Respublika ixtisoslashtirilgan travmatologiya va ortopediya ilmiy-amaliy tibbiyot markazining zamonaviy andozalar darajasida barpo etilgan va eng so‘nggi tibbiy texnologiyalar bilan jihozlangan yetti qavatli yangi majmuasi foydalanishga topshirilganiga uch yil to‘ladi. O‘tgan vaqt ichida qanchadan-qancha bemor ushbu markaz orqali o‘z sog‘ligini tikladi, xorijga borib davolanishga sarflanadigan puli tejaldi.

O‘sha vaqtda markazda konsultativ poliklinika, tez yordam bo‘limi, 240 o‘ringa mo‘ljallangan 8 ta statsionar va 6 ta paraklinik bo‘lim faoliyat ko‘rsatishni boshlagandi. Markazda operatsiyalar sonini yiliga 8000 taga, ulardan yangi texnologiyali operatsiyalarni 6400 taga oshirish rejalashtirilgan edi. “Daryo” mazkur tibbiyot markazining bugungi kundagi faoliyati, u yerda yaratilgan sharoitlar va bemorlarning holati bilan tanishdi.

Muassasa direktori Murod Irismetov “Daryo”ga bergan intervyusida markaz faoliyati, xodimlarning oylik maoshlari va tibbiyot sohasi haqida fikrlarini bildirib o‘tdi.

2019-yilning 10-aprelidan boshlab biz tamoman yangicha ishlashga o‘tib ketdik desa bo‘ladi. Misol uchun, eski binoda bizda oltita operatsiya xonasi bor edi. U xonalarning jihozlanishi ham zamon talabiga javob bermas edi. Texnikalarni ham avval olganimizdan beri ishlatib kelardik. 2019-yilning aprelidan boshlab esa biz sakkizda operatsion xonalarga ega bo‘ldik. Bu yerda jahonda qilinayotgan eng murakkab operatsiyalar ham amalga oshiriladi. Avval kuniga ko‘pi bilan uchta operatsiya amalga oshirilar edi, to‘rtinchisiga esa qo‘rqardik. Sababi u yerdagi muhit, bemorlarda operatsiyadan keyin qanday jarayon kechadi, yiringlash holatlari kuzatiladimi, degan qo‘rquvlarimiz bo‘lardi. Hozir esa bu kabi xavflar yo‘q. Har bir operatsiya xonasida havoning tozalangan oqimi aylanib turadi. Bugun kunda bir kunda o‘rtacha 45-50 ta operatsiya amalga oshiriladi. Yaqinda biz yangi bo‘limlar ochdik, bular artroskopiya, qo‘l-oyoq panjasi xirurgiyasi bo‘limi.So‘nggi ikki yilda markazimizga keladigan bemorlar soni kamaydi. Sababi bu yerda o‘qib, o‘z malakasini oshirgan hamkasblarimiz o‘z hududlarida operatsiyalarni mustaqil va mukammal bajarishmoqda. Boshqa tomondan olib qarasak, markazimizga Toshkent shahri va Toshkent viloyatidan keladigan bemorlar soni ko‘paygan ham. Masalan, bir bemor Hindistonga borib bitta oyog‘ini artroskopik operatsiya qildirib kelgan. Oradan bir yil o‘tib ushbu markaz haqida eshitib qolgan va u bu yerga kelgan. Shu kabi bemorlar soni ancha ko‘paygan.

Shifokorlarning oylik maoshlari oshishi avvalo o‘zlariga bog‘liq. Agar ular yuklama bilan ishlamay, o‘z ustida ishlamasa oylik maoshi oshmaydi. Bugungi kunda har bir shifokorning o‘z yuklamasi bor, masalan, kun davomida 22 bemorni ko‘rishi kerak yoki bir kunda to‘rtta operatsiyani qilish kerak. Agarda shifokor shunday tempda ishlasa, operatsiyalarni qilsa, oylik maoshi ham oshadi. Bizning markazimizda bugungi kunda shifokorlar o‘rtacha 14-16 million so‘m oylik olyapti, endi ishga kelganlar esa 5 million so‘m oylik olyapti. Bizda o‘rtacha oylikni 8 million so‘mdan yuqori.

Bir bemorimiz bor edi, u avval chet elga borib bitta oyog‘ini 15 ming yevroga operatsiya qildirib kelgan. Oradan vaqt o‘tgach, o‘sha bemor bizning markazimizga kelib operatsiya qildirdi. Umumiy hisoblanganda, barcha xarajatlar 15 millionga tushdi. U “biz ham yuqori darajaga yetibmiz-ku”, degan gapni aytdi.

Respublika ixtisoslashtirilgan travmatologiya va ortopediya ilmiy-amaliy tibbiyot markazi direktori Murod Irismetov

“Daryo” muxbiri ushbu tibbiyot markazida davolanayotgan bemorlarning fikrlari bilan ham qiziqdi. Bemorlardan biri 26 yoshli Dilnoza Xalilova bo‘ldi.

Jarohat asoratlari bo‘limi shifokori Zoir G‘oipovning ma’lum qilishicha, Dilnoza Xalilova Respublika ixtisoslashtirilgan travmatologiya va ortopediya ilmiy-amaliy tibbiyot markaziga 12-mart kuni murojaat qilgan.

“Bemor 12 yoshidan boshlab Buxoro va Samarqand viloyatida bir necha bor davolangan. Ular bir necha bor xorijlik shifokorlar bilan gaplashishgan, ularning tavsiyalarini eshitishgan. Bemor bizga o‘ng va chap bo‘ksa sohalaridagi og‘riqlarga, harakatlar cheklanganligiga va yurganda oqsoqlanib yurish shikoyati bilan keldi. 13-mart kuni esa uni operatsiya qildik”, — deydi Zoir G‘oipov.

Dilnoza Xalilova “Daryo”ga operatsiya jarayonidan avval bo‘lgan xavotiri, kelajakdagi rejalari haqida so‘zlab berdi.

Men 26 yoshdaman. Bolaligimdan kasallik bor edi. Yoshlik vaqtimda ham operatsiya bo‘ldim. Shundan so‘ng tez-tez muolajalar olib yurardim. Operatsiya qildirish kerak bo‘lganda esa juda ko‘p shifokorlar bilan maslahat qildim, xorijdagi shifokorlar ham operatsiya jarayoni og‘ir kechishini, asoratlar ham boshqacha bo‘lishini aytishdi. Bundan tashqari, xorijda operatsiya qildirgudek bo‘lsak xarajatlar ham ko‘p ketar edi.

O‘zbekistondagi ushbu markazda esa xarajat ko‘p bo‘lmadi. Operatsiya ham juda yaxshi o‘tdi. Bizda ham xorijdagidek operatsiya qilsa bo‘lar ekan. Bir oydan so‘ng yurib ketishimni aytishyapti.

Operatsiyadan avval qo‘rquv bo‘lmadi. Faqatgina operatsiya o‘tgach yurolmasligim, oyog‘im ishlamay qolishi meni o‘ylantirdi. Operatsiyadan chiqib esa oyog‘imni qimirlata olmadim, barmoqlarim ishladi. Bundan juda xursand bo‘ldim, eng asosiysi esa yurib ketaman. Endigi rejalar haqida gapiradigan bo‘lsam, o‘qishga kirmoqchiman, uni bitirib ishlamoqchiman”, — deydi Dilnoza Xalilova.

Ma’lumot uchun, ertaga O‘zbekiston prezidenti Shavkat Mirziyoyev sog‘liqni saqlash sohasi vakillari bilan ochiq muloqot o‘tkazadi. Prezident matbuot kotibi Sherzod Asadovning ma’lum qilishicha, “bunday tadbir mamlakatimiz tarixida ilk marotaba o‘tkazilayotgan bo‘lib, unda sohani yanada rivojlantirish, tizimli muammolarni bartaraf etish chora-tadbirlari muhokama qilinadi, tibbiyot xodimlarining takliflari eshitiladi”.

Qayd etilishicha, ochiq muloqotga tayyorgarlik doirasida tibbiyot xodimlari va aholidan 25 mingdan ortiq murojaat va takliflar kelib tushgan. Ular tahlil qilinib, “Inson qadri uchun” degan ezgu g‘oya asosida yurtimiz sog‘liqni saqlash tizimini yangi bosqichga olib chiqish va xalqimizga tibbiy xizmat ko‘rsatish samaradorligi va sifatini oshirishga qaratilgan keng ko‘lamli chora-tadbirlar ishlab chiqildi.

Uchrashuvda sohaning barcha bo‘g‘inlaridan 10 ming nafardan ziyod xodim ishtirok etishi kutilmoqda.