Qashqadaryo viloyatida kelgan sel hududga ko‘plab talafotlar yetkazmoqda. Sel Kosonda avtomobil yo‘li o‘pirib tashlagan bo‘lsa, Qamashida yo‘lni yuvib ketdi.
Qayd etilishicha, Koson tumanining “Rahimso‘fi” mahallasi Bo‘rixona qishlog‘i hududidan o‘tgan mahalliy ahamiyatdagi qatnov yo‘lining o‘pirilib tushishi oqibatida mazkur yo‘lda qatnov to‘xtatilib, yopib qo‘yilgan.
“Ayni paytda hududni Favqulodda vaziyatlar boshqarmasi va tuman bo‘limi xodimlari, ichki ishlar bo‘limi xodimlari nazorat qilmoqda. Baxtsiz hodisalarning oldini olish maqsadida haydovchilarni ogohlantirish uchun maxsus yo‘l belgilari ham o‘rnatilgan. Holatni tuman hokimi ham o‘z nazoratiga oldi”, — deyiladi hokimlik axborotida.
Hokimlikning qo‘shimcha qilishicha, Bo‘rixona qishlog‘i ichidagi yo‘lda qatnov to‘xtatilgani bois fuqarolar tuman markaziga Toshli qishlog‘idagi ichki yo‘ldan o‘tib borishi mumkin bo‘ladi.
“Ta’mirlash ishlari sel toshqinlari to‘xtaganidan so‘ng amalga oshiriladi”, — deydi hokimlik vakillari vaziyatga izoh berar ekan.
Qamashi tumanidagi sel esa 4K—298 Sho‘rcha—Qamashi—Xontushdi avtomobil yo‘lidagi yo‘lni yuvib ketdi.
“Hozirda ushbu yo‘lda transport vositalari harakatlari to‘liq to‘xtatilgan. Aholi vaqtinchalik 4K-430 Qamashi—Chimqo‘rg‘on va 4R Qarshi—Shahrisabz avtomobil yo‘li orqali tuman markaziga kirib bormoqda. Aynan shu yerdan yangi ko‘prik qurilishi boshlangan. Tez orada ushbu yo‘lda avtotransport vositalari harakatlanishi uchun sharoit yaratiladi”, — deydi Qamashi tumani hokimligi axborot xizmati rahbari Nurbek Rasulov.
Nurbek Rasulovning qo‘shimcha qilishicha, Sho‘rcha qishlog‘ida qurilayotgan ko‘prik uchun 1,8 milliard so‘m mablag‘ ajratilgan bo‘lib, qurilish ishlari 2022-yilning uchinchi choragida yakunlanadi.
Izoh (0)