Қашқадарё вилоятида келган сел ҳудудга кўплаб талафотлар етказмоқда. Сел Косонда автомобиль йўли ўпириб ташлаган бўлса, Қамашида йўлни ювиб кетди.
Қайд этилишича, Косон туманининг «Раҳимсўфи» маҳалласи Бўрихона қишлоғи ҳудудидан ўтган маҳаллий аҳамиятдаги қатнов йўлининг ўпирилиб тушиши оқибатида мазкур йўлда қатнов тўхтатилиб, ёпиб қўйилган.
«Айни пайтда ҳудудни Фавқулодда вазиятлар бошқармаси ва туман бўлими ходимлари, ички ишлар бўлими ходимлари назорат қилмоқда. Бахтсиз ҳодисаларнинг олдини олиш мақсадида ҳайдовчиларни огоҳлантириш учун махсус йўл белгилари ҳам ўрнатилган. Ҳолатни туман ҳокими ҳам ўз назоратига олди», — дейилади ҳокимлик ахборотида.
Ҳокимликнинг қўшимча қилишича, Бўрихона қишлоғи ичидаги йўлда қатнов тўхтатилгани боис фуқаролар туман марказига Тошли қишлоғидаги ички йўлдан ўтиб бориши мумкин бўлади.
«Таъмирлаш ишлари сел тошқинлари тўхтаганидан сўнг амалга оширилади», — дейди ҳокимлик вакиллари вазиятга изоҳ берар экан.
Қамаши туманидаги сел эса 4К—298 Шўрча—Қамаши—Хонтушди автомобиль йўлидаги йўлни ювиб кетди.
«Ҳозирда ушбу йўлда транспорт воситалари ҳаракатлари тўлиқ тўхтатилган. Аҳоли вақтинчалик 4К-430 Қамаши—Чимқўрғон ва 4Р Қарши—Шаҳрисабз автомобиль йўли орқали туман марказига кириб бормоқда. Айнан шу ердан янги кўприк қурилиши бошланган. Тез орада ушбу йўлда автотранспорт воситалари ҳаракатланиши учун шароит яратилади», — дейди Қамаши тумани ҳокимлиги ахборот хизмати раҳбари Нурбек Расулов.
Нурбек Расуловнинг қўшимча қилишича, Шўрча қишлоғида қурилаётган кўприк учун 1,8 миллиард сўм маблағ ажратилган бўлиб, қурилиш ишлари 2022 йилнинг учинчи чорагида якунланади.
Мавзуга доир: Кучли ёмғир сабаб сувга тўлган Андижон (фото ва видео)
Изоҳ (0)