Zangiota 1 va 2-son yuqumli kasalliklar shifoxonalarida bor-yo‘g‘i 560 nafarga yaqin bemor qoldi, deb xabar bermoqda Sog‘liqni saqlash vazirligi.
Ma’lum bo‘lishicha, bemorlarning 42 nafari og‘ir, 52 nafari esa o‘ta og‘ir ahvolda.
“Yurtimizda epidemik vaziyat barqarorlashgani bois muassasamizga kelayotgan bemorlar soni sezilarli darajada kamaydi. Jumladan, hozir shifoxonamizga bir kunda o‘rtacha 40—45 nafar bemor murojaat qilib, ularning 30—35 nafari sog‘aymoqda”, — deydi Zangiota 1-son yuqumli kasalliklar shifoxonasi direktori Anvar Husanov.
Yanvar oyi o‘rtalarida bu boradagi vaziyat murakkab bo‘lib, kuniga o‘rtacha 300—400 nafar bemor olib kelingan va ularning 200—300 nafari gospitalizatsiya qilingan edi.
Ta’kidlanishicha, bugungi kunda shifoxonaga kelayotgan bemorlarning aksariyatida kasallik yengil kechib, asosan isitma, bosh og‘rig‘i hamda holsizlik kabi belgilar bilan namoyon bo‘lmoqda. Qolaversa, ko‘pchilik bemorlarda saturatsiyaning pasayishi va o‘pkaning zararlanishi deyarli kuzatilmayapti. Virusning jiddiy asoratlar bilan kechishi esa nisbatan kam.
“Ammo bu xotirjamlikka berilish uchun asos bo‘la olmaydi. Sababi koronavirus mutatsiyaga uchrashini inobatga olsak, vaziyat tez o‘zgarishi mumkin. Shunday ekan, yurtdoshlarimizning kasallikka qarshi to‘liq va buster dozalarda emlanishlarini tavsiya qilaman. Chunki vaksina olgandan so‘ng shakllangan immunitet xastalikni o‘tkazgandan keyingi himoyadan yaxshiroq”, — deydi Husanov.
Eslatib o‘tamiz, 17-mart kuni O‘zbekistonga Yaponiyadan gumanitar yordam sifatida 201 600 doza AstraZeneca vaksinasi keltirildi. Shunday qilib, O‘zbekistonda foydalanilayotgan vaksinalar miqdori 61 470 153 dozaga yetdi.
Izoh (0)