Shavkat Mirziyoyev 16-mart kuni Davlat soliq qo‘mitasiga tashrif buyurib, soliq ma’murchiligini isloh qilish va sohaga axborot texnologiyalarini keng joriy etish masalalari yuzasidan yig‘ilish o‘tkazdi. Unda DSQ raisi yo‘lga qo‘yilgan keshbek masalasiga to‘xtaldi, deb xabar bermoqda “Daryo” muxbiri.
Qayd etilishicha, Sherzod Kudbiyev prezidentga soliq sohasidagi so‘nggi yangiliklar bo‘yicha taqdimot o‘tkazgan. Jumladan, xarid chekini ro‘yxatdan o‘tkazish orqali keshbek qaytarilishi bo‘yicha ma’lumot bergan.
“Soliq sohasidagi yangiliklardan biri chek orqali keshbek yig‘ish bo‘ldi. Albatta, buning uchun sizga rahmat. Moliya vazirligi ham bu borada bizni qo‘llab-quvvatladi. Hozir insonlar qiziqishga ham ‘qani, keshbek berarmikin?’, deb o‘ylab chek so‘rashyapti. Yanvar oyida 25 milliard 521 million so‘mlik keshbek fuqarolarga qaytarib berildi. Fevral oyida esa 30 milliardlik keshbek qaytarib beriladi. Mart oyining 21—25-kunlarida bu keshbeklarni fuqarolarga o‘tkazib beramiz. Mart oyining bugungi kuniga qadar esa 15 milliard so‘m keshbek qaytariladi. Albatta, hali mart tugamadi, hali oy davom etadi. Chekni ro‘yxatdan o‘tkazish uchun maxsus mobil ilova bor, o‘sha yerda o‘tkaziladi. Ilovada qancha keshbek qaytarilganini ham ko‘rish mumkin. Shuningdek, mablag‘ni o‘z hisobiga ham o‘tkazish mumkin. Shaxsan menda ham bu ilova bor. O‘zim ham bu orqali cheklarni ro‘yxatdan o‘tkazaman”, — deydi Sherzod Kudbiyev.
Eslatib o‘tamiz, 2021-yilning oktabr oyida prezidentning nazorat-kassa texnikasidan foydalanishni takomillashtirishga doir qarori qabul qilingandi. Hujjat bilan 2022-yil 1-yanvardan boshlab chakana savdo, umumiy ovqatlanish va aholiga maishiy xizmat ko‘rsatish obyektlarida xaridni amalga oshirgan hamda ushbu xaridni soliq organlarining maxsus mobil ilovasida xarid chekining QR kod yordamida skanerlash orqali ro‘yxatdan o‘tkazgan jismoniy shaxslarga ularning bank kartalariga oy yakuni bilan xarid summasining 1 foizi respublika budjetidan qaytariladi.
DSQ ma’lumotiga ko‘ra, endilikda chekda MXIK kodi to‘g‘ri ko‘rsatilgan barcha tovarlar (xizmatlar) uchun keshbek taqdim etiladi. Rad etish to‘liq xarid summasiga (butun chek uchun) emas, balki faqat ma’lumotlar bazasida mavjud bo‘lmagan MXIK kodi ko‘rsatilgan mahsulot (tovar va xizmat)larga nisbatan qo‘llaniladi.
24-fevral holatiga ko‘ra, 2022-yil 1-yanvardan amaliyotga joriy etilgan keshbek tizimi orqali 86,7 ming nafar iste’molchiga 15,1 milliard so‘m keshbek to‘lab berilgan.
Mavzuga doir:
Izoh (0)