Шавкат Мирзиёев 16 март куни Давлат солиқ қўмитасига ташриф буюриб, солиқ маъмурчилигини ислоҳ қилиш ва соҳага ахборот технологияларини кенг жорий этиш масалалари юзасидан йиғилиш ўтказди. Унда ДСҚ раиси йўлга қўйилган кэшбэк масаласига тўхталди, деб хабар бермоқда «Дарё» мухбири.
Қайд этилишича, Шерзод Кудбиев президентга солиқ соҳасидаги сўнгги янгиликлар бўйича тақдимот ўтказган. Жумладан, харид чекини рўйхатдан ўтказиш орқали кэшбэк қайтарилиши бўйича маълумот берган.
«Солиқ соҳасидаги янгиликлардан бири чек орқали кэшбэк йиғиш бўлди. Албатта, бунинг учун сизга раҳмат. Молия вазирлиги ҳам бу борада бизни қўллаб-қувватлади. Ҳозир инсонлар қизиқишга ҳам ‘қани, кэшбэк берармикин?’, деб ўйлаб чек сўрашяпти. Январь ойида 25 миллиард 521 миллион сўмлик кэшбэк фуқароларга қайтариб берилди. Февраль ойида эса 30 миллиардлик кэшбэк қайтариб берилади. Март ойининг 21—25-кунларида бу кэшбэкларни фуқароларга ўтказиб берамиз. Март ойининг бугунги кунига қадар эса 15 миллиард сўм кэшбэк қайтарилади. Албатта, ҳали март тугамади, ҳали ой давом этади. Чекни рўйхатдан ўтказиш учун махсус мобил илова бор, ўша ерда ўтказилади. Иловада қанча кэшбэк қайтарилганини ҳам кўриш мумкин. Шунингдек, маблағни ўз ҳисобига ҳам ўтказиш мумкин. Шахсан менда ҳам бу илова бор. Ўзим ҳам бу орқали чекларни рўйхатдан ўтказаман», — дейди Шерзод Кудбиев.
Эслатиб ўтамиз, 2021 йилнинг октябрь ойида президентнинг назорат-касса техникасидан фойдаланишни такомиллаштиришга доир қарори қабул қилинганди. Ҳужжат билан 2022 йил 1 январдан бошлаб чакана савдо, умумий овқатланиш ва аҳолига маиший хизмат кўрсатиш объектларида харидни амалга оширган ҳамда ушбу харидни солиқ органларининг махсус мобил иловасида харид чекининг ҚР код ёрдамида сканерлаш орқали рўйхатдан ўтказган жисмоний шахсларга уларнинг банк карталарига ой якуни билан харид суммасининг 1 фоизи республика бюджетидан қайтарилади.
ДСҚ маълумотига кўра, эндиликда чекда МХИК коди тўғри кўрсатилган барча товарлар (хизматлар) учун кэшбэк тақдим этилади. Рад этиш тўлиқ харид суммасига (бутун чек учун) эмас, балки фақат маълумотлар базасида мавжуд бўлмаган МХИК коди кўрсатилган маҳсулот (товар ва хизмат)ларга нисбатан қўлланилади.
24 февраль ҳолатига кўра, 2022 йил 1 январдан амалиётга жорий этилган кэшбэк тизими орқали 86,7 минг нафар истеъмолчига 15,1 миллиард сўм кэшбэк тўлаб берилган.
Изоҳ (0)