Farg‘ona viloyatining Farg‘ona shahridagi ko‘p qavatli uylarning birida xonadon eshigi qulflanib qolishi oqibatida ichkarida yolg‘iz qolgan ikki nafar bola qutqarildi. Bu haqda “Daryo”ga viloyat Favqulodda vaziyatlar boshqarmasi axborot xizmati xabar berdi.
Ma’lum bo‘lishicha, 2022-yilning 15-mart kuni soat 17:30 da Farg‘ona shahar Murabbiylar ko‘chasi 3-uydagi xonadonlarning birida yashovchi fuqaro N.A. yashash xonadonining kirish eshigi qulflanib qolib, bir va ikki yarim yoshli farzandlari ichkarida yolg‘iz qolgani haqida 1050 qisqa raqami orqali murojaat qilib, yordam so‘ragan.
Favqulodda vaziyatlar boshqarmasi maxsus vazifalarni bajaruvchi mintaqaviy qutqaruv otryadi xodimlari aytilgan manzilga soat 17:41 da yetib borib, arqon yordamida uyning tom qismi orqali uyga kirgan. Maxsus moslamalar yordamida xonadonning temir eshigini ochib, fuqaroga amaliy yordam ko‘rsatgan. Uy ichida qolgan ikki nafar bola sog‘-salomat yaqinlariga topshirilgan.
Izoh (0)