Shavkat Mirziyoyev 16-mart kuni Qozog‘iston prezidenti Qosim-Jo‘mart To‘qayev bilan telefon orqali muloqot qildi. Bu haqda Prezident matbuot xizmati xabar qildi.
Qayd etilishicha, davlat rahbarlari ikki tomonlama munosabatlar kun tartibi va Markaziy Osiyoda mintaqaviy hamkorlikning dolzarb masalalarini muhokama qilgan. Jahon iqtisodiyotidagi inqirozli hodisalarning salbiy oqibatlarini kamaytirish maqsadida yaqindan hamkorlikni davom ettirish va sa’y-harakatlarni samarali muvofiqlashtirishga alohida e’tibor qaratilgan.
Ikki tomonlama savdo hajmining o‘sish sur’atini ta’minlash, sanoat, energetika, qishloq xo‘jaligi, oziq-ovqat va to‘qimachilik tarmoqlari, transport va logistika sohalarida yirik kooperatsiya loyihalarini amalga oshirishni jadallashtirish uchun qulay sharoitlar yaratish, shuningdek, madaniy-gumanitar almashinuv dasturi doirasidagi qo‘shma tadbirlarni faol o‘tkazish muhimligi qayd etilgan.
Muloqot yakunida davlat rahbarlari yaqinlashib kelayotgan Navro‘z bayrami munosabati bilan bir-birini qutlab, qo‘shni xalqlarga tinchlik-osoyishtalik, farovonlik va ravnaq tilagan. Suhbat ochiq va do‘stona ruhda o‘tgan.
Eslatib o‘tamiz, kecha, 15-mart kuni Shavkat Mirziyoyev telefon muloqotida Turkmaniston prezidenti Gurbanguli Berdimuhamedovni muhim siyosiy tadbir — prezident saylovi muvaffaqiyatli o‘tkazilgani, Turkmanistonning saylangan prezidenti Serdar Berdimuhamedovni esa saylovda qozongan ishonchli g‘alabasi bilan tabriklagandi.
Izoh (0)