2021 йил давомида Ўзбекистондаги автомобиль йўлларидаги 7078 та объектда назорат ишлари ўтказилган. Мазкур объектлардаги назорат ишлари натижасида 11 949 та қоида бузилиш ҳолати аниқланган. Бу ҳақда АОКАда ўтказилган брифингда «Ўзйўлинспекция» бошқарма бошлиғи Дилшод Охунжонов маълум қилди.
Текширилган 45 та йўл қурилиш объектининг 27 таси меъёрий ҳужжатлар талабларига жавоб бермаслиги аниқланди
Назорат қилиш ишлари натижасида 189 та ҳолат бўйича 6,5 миллиард сўмлик сифатсиз бажарилган қурилиш-монтаж ишлар ҳажмини тўловдан чиқариш бўйича буюртмачиларга талабномалар киритилган.
Қўпол равишдаги қоида бузилишларга йўл қўйган ва инспекторлар томонидан берилган кўрсатмаларни белгиланган муддатда бартараф этмаган мансабдор шахсларга нисбатан Маъмурий жавобгарлик тўғрисидаги кодекснинг тегишли моддалари асосида чоралар қўллаш бўйича 254 та маъмурий баённома расмийлаштирилиб, суд органларига юборилган. Бугунги кунда судлар томонидан 227 таси бўйича 271,24 миллион сўм ундирилган.
Шу каби 36 та ҳолатда шаҳарсозлик соҳасидаги қонун ҳужжатлари талабларини бузаётган мансабдор шахсларни жавобгарликка тортиш тўғрисида юқори турувчи органларига тақдимнома киритилган. Қоида бузилишлар бартараф этилмаган 7 та ҳолат бўйича материаллар ҳуқуқ-тартибот органларига юборилган.
Ҳисобот даврида 45 та йўл қурилиш объектларида сифат даражасини аниқлаш бўйича 4464 та синов ишлари ўтказилган. Натижада 40 та синов баённома хулосаларида — 27 та объектда бажарилган йўл қурилиш ишлари, меъёрий ҳужжатлар талабига жавоб бермаслиги аниқланиб, ваколатли органларга маълумотнома киритилган.
Изоҳ (0)