“O‘zbekiston Respublikasining Hisob palatasi to‘g‘risida”gi qonuniga asosan Hisob palatasining 2021-yilgi faoliyati yuzasidan taqdim etgan hisoboti shu kunlarda Oliy Majlis Qonunchilik palatasi deputatlari tomonidan ko‘rib chiqilmoqda. Bu haqda parlament quyi palatasi deputati Doniyor G‘aniyev ma’lum qildi.
Hisobotda Hisob palatasi tomonidan amalga oshirilgan nazorat tadbirlari natijasida 2021-yil budjet xarajatlari 2,1 trillion so‘mga maqbullashtirilib, davlat budjetiga 527 milliard so‘m qo‘shimcha manbalar aniqlangani, shuningdek, budjet mablag‘lari hisobidan 338 milliard so‘mlik noqonuniy xarajat va o‘zlashtirishlar, davlat xaridlari jarayonida esa 971,1 milliard so‘mlik manfaatlar to‘qnashuviga yo‘l qo‘yilgan 763 ta holat aniqlangani qayd etilgan.
Shuningdek, Hisob palatasi tomonidan oliy ta’lim muassasalariga qo‘shimcha tabaqalashtirilgan to‘lov-kontrakt asosida (“super-kontrakt”) o‘qishga qabul qilingan talabalarning hujjatlari o‘rganilgan. Aniqlanishicha, 10 ta oliy ta’lim muassasasida 117 nafar talabaning Davlat test markazi ma’lumotnomasidagi ballarini soxtalashtirish orqali ularni “super-kontrakt” summalari miqdori jami 9,6 milliard so‘mga kam hisoblangan.
Misol uchun, Toshkent tibbiyot akademiyasida 2020/2021-o‘quv yilida fuqaro F.B. kirish imtihonida aslida atigi 56,6 ball olgan bo‘lsa-da, uning to‘plagan bali 132,7 ball etib ko‘rsatilgan hamda undan 279,4 million o‘rniga 139,7 million so‘m to‘lov-kontrakt puli (139,7 million so‘m kam) olingan.
“Oddiy qilib aytganda, oliy ta’lim muassasalariga kirishda aynan korrupsiyaning oldini olish maqsadida joriy qilingan ‘super-kontrakt’ tizimining o‘zida ham korrupsiya holatlari aniqlangan. Ya’ni korrupsiyaga qarshi kurashish orqali ham ‘soqqa’ qilish yo‘lini o‘ylab topishgan. Qoyil qolmay iloji yo‘q”, — deb yozadi deputat.
Hisobotda keltirilishicha, kelgusida bunday holatlar takrorlanishining oldini olish maqsadida, 2021/2022-o‘quv yilidan boshlab tabaqalashtirilgan to‘lov-kontrakt asosida o‘qimoqchi bo‘lganlar uchun onlayn platforma yaratilib, arizalar avtomatik tarzda qabul qilinishi va shartnomalar summasini inson omilining aralashuvisiz hisoblanishi yo‘lga qo‘yilgan.
Avvalroq oliy va o‘rta maxsus ta’lim vaziri Abduqodir Toshqulov Jizzax viloyati OTMlarida o‘tkazilgan kompleks o‘rganishlardan so‘ng yig‘ilish o‘tkazib, ta’lim sifatini oshirish yuzasidan professor-o‘qituvchilarga murojaat qilgandi. “Xalq, rahbariyat oliy ta’limning ‘yuvelir’ darajada toza bo‘lishini xohlaydi. Butun dunyoda shunaqa o‘zi. Bunday narsalar odamlarning xayoliga ham kelmaydi. Shuning uchun buning targ‘ibotini qilish kerak, bundan xulosa qilish kerak. Men qurilish bilan oliy ta’lim korrupsiyadan xoli soha deb e’lon qilgani uyalaman. Bu siz bilan bizga daraja emas, uyat bu”, — degan edi Toshqulov.
Izoh (0)