«Ўзбекистон Республикасининг Ҳисоб палатаси тўғрисида»ги қонунига асосан Ҳисоб палатасининг 2021 йилги фаолияти юзасидан тақдим этган ҳисоботи шу кунларда Олий Мажлис Қонунчилик палатаси депутатлари томонидан кўриб чиқилмоқда. Бу ҳақда парламент қуйи палатаси депутати Дониёр Ғаниев маълум қилди.
Ҳисоботда Ҳисоб палатаси томонидан амалга оширилган назорат тадбирлари натижасида 2021 йил бюджет харажатлари 2,1 триллион сўмга мақбуллаштирилиб, давлат бюджетига 527 миллиард сўм қўшимча манбалар аниқлангани, шунингдек, бюджет маблағлари ҳисобидан 338 миллиард сўмлик ноқонуний харажат ва ўзлаштиришлар, давлат харидлари жараёнида эса 971,1 миллиард сўмлик манфаатлар тўқнашувига йўл қўйилган 763 та ҳолат аниқлангани қайд этилган.
Шунингдек, Ҳисоб палатаси томонидан олий таълим муассасаларига қўшимча табақалаштирилган тўлов-контракт асосида («супер-контракт») ўқишга қабул қилинган талабаларнинг ҳужжатлари ўрганилган. Аниқланишича, 10 та олий таълим муассасасида 117 нафар талабанинг Давлат тест маркази маълумотномасидаги балларини сохталаштириш орқали уларни «супер-контракт» суммалари миқдори жами 9,6 миллиард сўмга кам ҳисобланган.
Мисол учун, Тошкент тиббиёт академиясида 2020/2021-ўқув йилида фуқаро Ф.Б. кириш имтиҳонида аслида атиги 56,6 балл олган бўлса-да, унинг тўплаган бали 132,7 балл этиб кўрсатилган ҳамда ундан 279,4 миллион ўрнига 139,7 миллион сўм тўлов-контракт пули (139,7 миллион сўм кам) олинган.
«Оддий қилиб айтганда, олий таълим муассасаларига киришда айнан коррупциянинг олдини олиш мақсадида жорий қилинган ‘супер-контракт’ тизимининг ўзида ҳам коррупция ҳолатлари аниқланган. Яъни коррупцияга қарши курашиш орқали ҳам ‘соққа’ қилиш йўлини ўйлаб топишган. Қойил қолмай иложи йўқ», — деб ёзади депутат.
Ҳисоботда келтирилишича, келгусида бундай ҳолатлар такрорланишининг олдини олиш мақсадида, 2021/2022-ўқув йилидан бошлаб табақалаштирилган тўлов-контракт асосида ўқимоқчи бўлганлар учун онлайн платформа яратилиб, аризалар автоматик тарзда қабул қилиниши ва шартномалар суммасини инсон омилининг аралашувисиз ҳисобланиши йўлга қўйилган.
Аввалроқ олий ва ўрта махсус таълим вазири Абдуқодир Тошқулов Жиззах вилояти ОТМларида ўтказилган комплекс ўрганишлардан сўнг йиғилиш ўтказиб, таълим сифатини ошириш юзасидан профессор-ўқитувчиларга мурожаат қилганди. «Халқ, раҳбарият олий таълимнинг ‘ювелир’ даражада тоза бўлишини хоҳлайди. Бутун дунёда шунақа ўзи. Бундай нарсалар одамларнинг хаёлига ҳам келмайди. Шунинг учун бунинг тарғиботини қилиш керак, бундан хулоса қилиш керак. Мен қурилиш билан олий таълим коррупциядан холи соҳа деб эълон қилгани уяламан. Бу сиз билан бизга даража эмас, уят бу», — деган эди Тошқулов.
Изоҳ (0)