Toshkent shahri Yunusobod tumanida 12-mart kuni sotuvchilar va ularning oila a’zolari o‘rtasida janjal sodir bo‘lgani xabar qilingandi. Tergov departamenti holat yuzasidan qo‘shimcha ma’lumot berdi.
Qayd etilishicha, shu kuni soat 17:30 larda Yunusobod tumani Markaz-4 dahasidagi “Abdulla Qodiriy” metro bekati oldida joylashgan do‘konlardan biridagi sotuvchi Z.N. (1999-yilda tug‘ilgan) sobiq sotuvchisi M.F. (1999-yilda tug‘ilgan) bilan kiyim masalasida o‘zaro gap talashib qolgan.
Ularning mojarosiga M.F.ning onasi M.F. (1980-yilda tug‘ilgan) va Z.N.ning singlisi Z.D. (2003-yilda tug‘ilgan) aralashgan, oqibatda bu mojaro janjalga aylanib ketgan. Shu yerda bo‘lgan G‘.L. (1998-yilda tug‘ilgan), V.O. (1973-yilda tug‘ilgan) ularni ajratishga harakat qilgan. Fuqaro M.F. yengil jarohat olgan.
Holat yuzasidan Jinoyat kodeksning 277-moddasi 3-qismi “g” bandi ( jamoat tartibini saqlash vazifasini bajarib turgan hokimiyat vakili yoki jamoatchilik vakiliga yoxud bezorilik harakatlarining oldini olish chorasini ko‘rgan boshqa fuqarolarga qarshilik ko‘rsatib sodir etilgan bezorilik) bilan jinoyat ishi qo‘zg‘atilgan. Hozirda tergov harakatlari davom etmoqda.
Mavzuga doir:
Izoh (0)