Oliy va o‘rta maxsus ta’lim vaziri Abduqodir Toshqulov Prezident 4—5-fevral kunlari Farg‘ona viloyatiga tashrifi asnosida viloyatdagi OTMlarga shaxsan o‘zi bordi. Bu haqda vazirlik matbuot xizmatiga tayanib, “Gazeta.uz” xabar berdi.

Foto: “Daryo”

U Muqimiy nomidagi Qo‘qon davlat pedagogika institutidagi taassurotlari bilan o‘rtoqlashdi.

“Kapital rekonstruksiya bo‘layotgan binoni ko‘rsatmoqchi bo‘lishdi, men yo‘q dedim. To‘qqiz qavatli binolaring bor ekan, o‘shaning yettinchi qavatiga chiqaringlar, dedim. Chiqdik, tarix fakulteti joylashgan ekan. Bino achinarli holatda. Joriy yoki kapital ta’mirlash umuman bo‘lmagan. Eshik, deraza, devorlar eski, mana eshikka e’tibor bering, bundan 20 yil oldingi ‘kolxoz’ni idorasi ham bunday emas. 9 qavatning hamma auditoriyasi shu ahvolda”, — deya ta’kidladi vazir.

U, shuningdek, OTMning hisobida mablag‘i bo‘la turib, o‘z binosini ta’mirlamagani haqida gapirgan.

“100 milliard so‘mdan ko‘p puli bor hisobida. Yangi bino qurishni orzu qilib turibdi bular. Men iqtisodchiman, taxminiy hisob-kitob qilsam, bir qavatini 120 million so‘m bilan normal holatga olib kelsa bo‘ladi. Kamida 46 million so‘m superkontrakt to‘lagan talaba mana shu eshikdan kiradi. Devorlarni qarang. Ularning topib olgan gapi, ‘Xalq ta’limidan yaqinda o‘tdi’. Uch yil bo‘lgan bizga o‘tganiga. Har yili bitta qavatdan qilsa ham bo‘lar edi”, — deydi Toshqulov.

Bundan tashqari, vazir rektorlarning moliyaviy mustaqillikka ega emasligini ro‘kach qilishiga ham to‘xtalib o‘tgan.

“Biroz oldin Yoshlar ishlari agentligi direktoriga (Alisher Sa’dullayev) talaba ‘o‘tira olmaymiz partalarga’ deb shikoyat qilgan ekan. Haqiqatan ham maktab o‘quvchisi o‘tirmaydigan, andozaga to‘g‘ri kelmaydigan parta, stullar. Ularni topib olgan gapi, ‘biz moliyaviy mustaqillikka ega emasmiz’. Asosiy smetada necha pul qo‘yib bersangiz, Moliya vazirligi, Oliy va o‘rta maxsus ta’lim vazirligi sizga tasdiqlab beradi. Yana qanaqa moliyaviy mustaqillik kerak?” — dedi OTM vaziri.

Abduqodir Toshqulov kitoblarning ahvoli ham e’tiborinini tortgani aytgan. U eng yangi kitob 1996-yilgi ekanini, axborot resurs markazi 2013-yildan buyon talab darajasida adabiyotlar bilan yangilanmagani, qariyb o‘n yil oldingi o‘quv reja va dasturlardan foydalanilayotgani ta’kidlangan. Milliy g‘oya, ma’naviyat asoslari va huquqiy ta’lim kafedrasida soat 14:00 da birorta o‘qituvchi yo‘qligini aytdi.

Soliq va soliqqa tortish fanidan o‘quv-uslubiy majmua. Qo‘qon—2013-yil

Foto: Oliy va o‘rta maxsus ta’lim vazirligi matbuot xizmati.

“Kafedra shkaflarida taxlab qo‘yilgan kurs ishlari, oraliq, yakuniy nazorat daftarlari holatini ko‘rdim. Oxirgi uch yillik turibdi, qog‘ozdan boshqa narsa yo‘q. Eng achinarlisi, birortasi tekshirilmagan. Baholar qo‘yilmagan. Lekin qaydnomalar amalga oshirilgan. Demak, bilimiga emas, holatiga qarab baholagan. Korrupsiyaviy holatlar bu yerda so‘rovlarda aniqlandi”, — dedi u.

Toshqulov o‘qitish uslublari eskicha ekanini, yangi texnologiyalar bo‘yicha darslar tashkil etish bo‘yicha gap ham bo‘lishi mumkin emasligini qayd etgan.

Axborot resurs markazi

Foto: Oliy va o‘rta maxsus ta’lim vazirligi matbuot xizmati.

“Abduvali Jonuzoqovich (vazirlik Oliy ta’lim muassasalari faoliyatini muvofiqlashtirish bosh boshqarmasi boshlig‘i Xoliqov Abduvali Jonuzoqovich), axborot-resurs markazidagi mana bu ahvolni qarang, o‘quv jarayonini aytdim sizga. Siz shunchalik qog‘ozga ko‘milib qolgansiz-ki, buni sizni yuzingizga qaragan odam ham biladi. Oppoq bo‘lib ketgansiz. Ertadan boshlab Qo‘qonda yurasiz”, — deydi lavozimga yaqinda tayinlangan vazir.

Abduqodir Toshqulov yig‘ilish natijalari bilan Qo‘qon davlat pedagogika instituti rektori Ma’murjon Otajonovga xayfsan berish masalasini ko‘rib chiqish bo‘yicha topshiriq ham bergan. Shu qatorda institut prorektorlariga faoliyatlarini qayta ko‘rib chiqish va mavjud kamchiliklarni bartaraf etishga bir oy muddat berildi.

“Ilmiy ishlar va innovatsiyalar bo‘yicha prorektor (Dilnoza Xo‘jayeva) 20−25 yildan beri lavozimda, fan nomzodi, dotsentlik olmagan. Ayol kishi ilmiy bo‘lim boshlig‘i, ayol kishi prorektor. Nimaga o‘zlari namuna bo‘lib, doktorlik (dissertatsiya) qilmaganlar? Nega doktorlarni olib kelib qo‘ymaysizlar shu joyga? ‘Chastniy lavochka’dan (xususiy rasta — tahr.) farqi yo‘q. Hech kim, hech kimni gapirmaydi, tamom. Bugun rektorlikka nomzod deyilsa, umuman topa olmaysizlar, munosib prorektor qo‘yilmagan”, — deya ta’kidlagan vazir.

Moliya va iqtisodiy ishlar bo‘yicha prorektor Mahammadali Ahmedovni egallab turgan lavozimidan ozod qilish masalasi bo‘yicha topshiriq berilgan.

Vazir institutning xo‘jalik-moliyaviy ahvolini qaytadan ko‘rib chiqish, qurilish tanlovlari (tender) qanday o‘tganini tekshirish bo‘yicha vazifa qo‘ygan. Uning aytishicha, “KRU unchalik e’tibor qilmayapti, Hisob palatasi ayab turibdi”.

Avvalroq Abduqodir Toshqulov oliy ta’lim muassasasida hammasini isloh qilish uchun atigi 3 oy yetarli ekanini aytgani, vazifasiga sovuqqonlik bilan yondashgan bir qator rektorlarni tanqid qilgani haqida xabar berilgan edi.