Қашқадарё вилояти ҳокими Муроджон Азимов бошчилигида шаҳар, туман ҳокимлари ва тадбиркорлардан иборат делегация кичик саноат зоналари ташкил этиш ва тадбиркорликни ривожлантириш тизими билан танишиш мақсадида Наманганга келди. Бу ҳақда «Дарё» мухбири Азизбек Абдувалиев хабар бермоқда.
Дастлаб делегация вакиллари Давлатобод туманидаги «Орзу» кичик саноат зонасида бўлиб, бу ерда Ideal Textile-Orzu корхонаси фаолияти билан танишди. 450 нафардан ортиқ ишчи-ходим меҳнат қилаётган мазкур корхонада костюм-шим, махсус униформа ва қишки кийимлар ишлаб чиқарилмоқда. Тайёр маҳсулотлар Россия, Италия ва Голландияга экспорт қилинмоқда.
Кейинги манзил «Янги ҳаёт» кичик саноат зонаси бўлди. Ушбу кичик саноат зонасида умумий қиймати 35,9 миллиард сўмлик 16 та лойиҳа амалга оширилиши натижасида 1104 та янги иш ўрни яратилган.
Қашқадарё делегацияси Давлатобод туманидаги «Юксалиш», «Ёшлар» ва «Кушон» кичик саноат зоналари билан ҳам танишди. Хусусан, «Юксалиш» кичик саноат зонасидаги Glass Expo корхонаси меҳмонларда катта таассурот қолдирди.
Бу ерда ойнага миллий нақшлар ва замонавий дизайн асосида ишлов берилади. Вилоятда ойна маҳсулотларини маҳаллийлаштириш, импорт ўрнини тўлдиришда алоҳида ўрни бўлган корхона тўла қувват билан ишга тушгач, йилига 1,2 миллион долларлик маҳсулот экспорт қилиш имкониятига эга бўлади.
Қашқадарё вилояти ҳокими бошчилигидаги делегациянинг Наманганга сафари давом этмоқда.
