Facebook’da o‘zini Korrupsiyaga qarshi kurashish agentligi xodimi sifatida tanishtirib, fuqaroni 11 ming dollarga chuv tushirgan shaxs 5 yarim yilga qamaldi

Facebook’da o‘zini Korrupsiyaga qarshi kurashish agentligi xodimi sifatida tanishtirgan shaxs fuqaroni 11 ming dollarga chuv tushirgani haqida xabar berilgandi. Mazkur shaxsga nisbatan qo‘zg‘atilgan jinoyat ishi yuzasidan sud jarayoni o‘z yakuniga yetdi, deya xabar qilmoqda agentlik.

Aniqlanishicha, M.M. o‘zganing mulkini aldash yo‘li bilan qo‘lga kiritish maqsadida dastlab 2019-yil avgust oyida fuqaro D.S.ning ishonchiga kirib, bankdan 1,5 milliard AQSh dollarilik kredit olish evaziga katta biznes boshlamoqchi ekanligi va bu biznesida uni o‘ziga ish boshqaruvchi sifatida ishga olishini va’da berib, kreditning birinchi to‘lovi uchun undan 110 million so‘m miqdorida qarz so‘raydi.

2020-yil 22-yanvar kuni notarial tartibda tuzilgan o‘zaro qarz shartnomasida M.M. ushbu mablag‘ni 2020-yil 23-avgust kuniga qaytarishni, aks holda o‘zi boshqarib yurgan Captiva rusumli avtomashinani D.S.ning nomiga rasmiylashtirib berishni qayd etadi. Shunga qaramay, M.M. va’dasini bajarmay, pullarni o‘z shaxsiy ehtiyojlari uchun ishlatib yuboradi va mashina ham aslida o‘zganing nomida ekani ma’lum bo‘ladi.

M.M. o‘zining jinoiy harakatlarini yana davom ettirib, firibgarlikka takroran qo‘l uradi. Bu gal u fuqaro N.S.ga o‘zini Korrupsiyaga qarshi kurashish agentligi xodimi sifatida tanishtirib, avtomashina va uy olib berishni va’da qilib, undan 11 000 AQSh dollari miqdoridagi pul mablag‘larini aldov yo‘li bilan qo‘lga kiritadi.

Ma’lum bo‘lishicha, M.M. agentlik tomonidan o‘tkazilgan rasmiy tadbirlarda boshqa fuqarolar qatorida ishtirok etib, ushbu tadbirlar yuzasidan internet tarmog‘ida berib borilayotgan foto-video lavhalarni o‘ziga saqlab olgan. Mazkur ma’lumotlarni atrofidagilarga ko‘rsatish orqali o‘zini agentlik xodimi ekanligiga ishontirishga harakat qilib kelgan. Shuningdek, u Facebook ijtimoiy tarmog‘ida profil ochib, o‘zining agentlikdagi ish faoliyati to‘g‘risida yolg‘on ma’lumotlarni joylashtirib kelgan.

Bunday firibgarlikdan jabrlangan fuqaro N.S. M.M.ga nisbatan qonuniy chora ko‘rilishini so‘rab, agentlik direktori nomiga ariza bilan murojaat qildi. Holat yuzasidan Yakkasaroy tumani ichki ishlar idorasi tomonidan unga nisbatan jinoyat ishi qo‘zg‘atilib, tergov harakatlari olib borildi.

Sud hukmiga ko‘ra, M.Mo‘minov Jinoyat kodeksining 168-moddasi 3-qismi “a, b” (juda ko‘p miqdorda o‘ta xavfli retsidivist tomonidan o‘zlashtirish yoki rastrata yo‘li bilan talon-toroj qilish) bandlarida nazarda tutilgan jinoyatlarni sodir etganlikda aybli deb topilib, unga nisbatan 5 yil-u 6 oy muddatga ozodlikdan mahrum qilish jazosi tayinlandi.

Shuningdek, sud qarorida M.M.dan jabrlanuvchi D.S.ning foydasiga 110 million so‘m, N.S.ning foydasiga esa 130 million so‘m undirilishi belgilandi.