Toshkent–Vodiy avtomobil yo‘lining 6 ta joyida tosh-tuproq massasi o‘pirilishi sodir bo‘lgani ma’lum qilindi

Qamchiq dovonidagi holat yuzasidan Favqulodda vaziyatlar vazirligi qo‘shimcha ma’lumot berdi.

Toshkent–O‘sh avtomobil yo‘lining Qamchiq dovoni qismida avtomobil yo‘lining xavfli hududlari “Qamchiq” maxsus, qidiruv, yong‘in-qutqaruv boshqarmasi, “Qamchiq” qor ko‘chkisini kuzatish stansiyasi, geologik xavfli jarayonlarni kuzatish “Farg‘ona” stansiyasi, “Qamchiqavtoyo‘l” xodimlari bilan hamkorlikda o‘rganib chiqildi.

O‘rganish natijalariga ko‘ra, soat 7:30 larda A-373 Toshkent–O‘sh avtomobil yo‘lining 229,8-kilometr hududida, avtomobil yo‘lidan 80–100 metr uzoqlikda tog‘ yonbag‘irliklaridan 300 ming metr/kub hajmda qor ko‘chkisi sodir bo‘lib, qor massalari Qamchiqsoy soyi o‘zaniga tushgan.

Shuningdek, Toshkent–Vodiy avtomobil yo‘lining 6 ta joyida tosh-tuproq massasi o‘pirilishi sodir bo‘lib, yo‘l chetdagi xandaqqa (kyuvetga) tushgan.

“Bundan tashqari, mustahkam bo‘lmagan tosh massalari avtomobil yo‘lining 251,7–260 kilometri oraliqlarida avtomobil yo‘liga tushishi mumkin bo‘lgan hududlar aniqlandi.

Hozirda xavfli hududlarda tosh massalarini majburiy tushirish bo‘yicha “Qamchiq” maxsus qidiruv, yong‘in-qutqaruv boshqarmasi, “Qamchiqavtoyo‘l” hamda yo‘l-harakati xavfsizligi xodimlari bilan hamkorlikda tadbirlar amalga oshirilmoqda.

Dovon yo‘lida sodir bo‘lgan geologik va gidrometeorologik hodisalar oqibatida jabrlangan va jarohat olganlar yo‘q”, – deyiladi xabarda.