Facebook’да ўзини Коррупцияга қарши курашиш агентлиги ходими сифатида таништириб, фуқарони 11 минг долларга чув туширган шахс 5 ярим йилга қамалди

Facebook’да ўзини Коррупцияга қарши курашиш агентлиги ходими сифатида таништирган шахс фуқарони 11 минг долларга чув туширгани ҳақида хабар берилганди. Мазкур шахсга нисбатан қўзғатилган жиноят иши юзасидан суд жараёни ўз якунига етди, дея хабар қилмоқда агентлик.

Аниқланишича, М.М. ўзганинг мулкини алдаш йўли билан қўлга киритиш мақсадида дастлаб 2019 йил август ойида фуқаро Д.С.нинг ишончига кириб, банкдан 1,5 миллиард АҚШ долларилик кредит олиш эвазига катта бизнес бошламоқчи эканлиги ва бу бизнесида уни ўзига иш бошқарувчи сифатида ишга олишини ваъда бериб, кредитнинг биринчи тўлови учун ундан 110 миллион сўм миқдорида қарз сўрайди.

2020 йил 22 январь куни нотариал тартибда тузилган ўзаро қарз шартномасида М.М. ушбу маблағни 2020 йил 23 август кунига қайтаришни, акс ҳолда ўзи бошқариб юрган Captiva русумли автомашинани Д.С.нинг номига расмийлаштириб беришни қайд этади. Шунга қарамай, М.М. ваъдасини бажармай, пулларни ўз шахсий эҳтиёжлари учун ишлатиб юборади ва машина ҳам аслида ўзганинг номида экани маълум бўлади.

М.М. ўзининг жиноий ҳаракатларини яна давом эттириб, фирибгарликка такроран қўл уради. Бу гал у фуқаро Н.С.га ўзини Коррупцияга қарши курашиш агентлиги ходими сифатида таништириб, автомашина ва уй олиб беришни ваъда қилиб, ундан 11 000 АҚШ доллари миқдоридаги пул маблағларини алдов йўли билан қўлга киритади.

Маълум бўлишича, М.М. агентлик томонидан ўтказилган расмий тадбирларда бошқа фуқаролар қаторида иштирок этиб, ушбу тадбирлар юзасидан интернет тармоғида бериб борилаётган фото-видео лавҳаларни ўзига сақлаб олган. Мазкур маълумотларни атрофидагиларга кўрсатиш орқали ўзини агентлик ходими эканлигига ишонтиришга ҳаракат қилиб келган. Шунингдек, у Facebook ижтимоий тармоғида профил очиб, ўзининг агентликдаги иш фаолияти тўғрисида ёлғон маълумотларни жойлаштириб келган.

Бундай фирибгарликдан жабрланган фуқаро Н.С. М.М.га нисбатан қонуний чора кўрилишини сўраб, агентлик директори номига ариза билан мурожаат қилди. Ҳолат юзасидан Яккасарой тумани ички ишлар идораси томонидан унга нисбатан жиноят иши қўзғатилиб, тергов ҳаракатлари олиб борилди.

Суд ҳукмига кўра, М.Мўминов Жиноят кодексининг 168-моддаси 3-қисми «а, б» (жуда кўп миқдорда ўта хавфли рецидивист томонидан ўзлаштириш ёки растрата йўли билан талон-торож қилиш) бандларида назарда тутилган жиноятларни содир этганликда айбли деб топилиб, унга нисбатан 5 йил-у 6 ой муддатга озодликдан маҳрум қилиш жазоси тайинланди.

Шунингдек, суд қарорида М.М.дан жабрланувчи Д.С.нинг фойдасига 110 миллион сўм, Н.С.нинг фойдасига эса 130 миллион сўм ундирилиши белгиланди.