Shavkat Mirziyoyev raisligida 11-mart kuni videoselektor yig‘ilishi bo‘lib o‘tmoqda. Prezident matbuot kotibi Sherzod Asadovning ma’lum qilishicha, unda sanoat kooperatsiyasini rivojlantirish va ishlab chiqarishni mahalliylashtirish chora-tadbirlari muhokama qilinadi.
“Bugungi o‘zgaruvchan sharoitda iqtisodiyotimizning barqaror o‘sishini ta’minlashning eng samarali yo‘li — ichki imkoniyatlarni ishga solish, ya’ni import bo‘layotgan tayyor mahsulotlarni o‘zimizda ishlab chiqarish va mahalliy sanoatni yanada rivojlantirishdan iborat. Bu milliy iqtisodiyotimizning ustuvor yo‘nalishi bo‘lishi kerak. Buni o‘ylamagan, atrofdagi vaziyatdan bexabar, siyosatni tushunmaydigan hokim yoki tarmoq rahbarining ishlashga haqqi yo‘q”, — degan davlat rahbari.
Yig‘ilishda 37 trillion so‘mlik yangi mahsulot ishlab chiqarish bo‘yicha 2022—2023-yillar uchun 2,5 mingta loyihani ishga tushirish bo‘yicha qabul qilingan dasturning aniq ijrosini so‘rash vaqti kelgani qayd etilgan.
Prezident ko‘p tarmoq va hudud rahbarlari bu masalada hali dunyoqarashini o‘zgartirmagani, hozirgi vaziyatdan xulosa chiqarmayotganini tanqid qilgan.
Shavkat Mirziyoyev 2021-yilning aprelida o‘tkazilgan videoselektor yig‘ilishida ham mahalliy sanoatni haqiqatda rivojlantirish masalasiga to‘xtalib o‘tib, bu borada mutlaqo yangi “vertikal” tizim joriy etilishini aytgandi.
“Bugungi kungacha birorta tuman, shahar yoki viloyat rahbari mahalliy sanoat salohiyati va undan foydalanishni chuqur va puxta o‘ylab ko‘rgani yo‘q. Hududga nima chetdan olib kelinyapti? Nimani o‘zida ishlab chiqarish mumkin? Buning uchun nima qilish kerak, degan savollar hokimlarni har kuni qiynashi kerak”, — degan edi prezident.
Izoh (0)