Namanganda ichimlik suvi mavjud bo‘lmagan 109 ta mahallaning 29 tasi 2022-yilda ichimlik suvi bilan ta’minlanadi. Bu haqda “Namangan suv ta’minoti” MChJ direktori Ilhomjon Shiranov ma’lum qildi, deya xabar beradi “Daryo” muxbiri Azizbek Abduvaliyev.
Shiranovning aytishicha, ulardan 8 tasi Investitsiya dasturi, 5 tasi “Obod qishloq” dasturi, 11 tasi mahalliy byudjet, 3 tasi ijtimoiy buyurtma, 2 tasi Jahon banki xalqaro taraqqiyot uyushmasi va Osiyo infratuzilmaviy investitsiyalar banki mablag‘lari hisobidan amalga oshiriladi.
“Qolgan 80 ta mahallani ichimlik suvi bilan ta’minlash holati tuman hokimliklari, MFY raislari, viloyat qurilish boshqarmasi hamda “Namangan suv ta’minoti” mutaxassislari ishtirokida joyida o‘rganib chiqilmoqda”, — deydi Ilhomjon Shiranov.
O‘rganishlar davomida ushbu 80ta mahallani ichimlik suvi bilan ta’minlash uchun 926,3 kilometr ichimlik suv tarmoqlari qurish, 1 kilometrini rekonstruksiya qilish, 23 ta tik quduq qazish, 38 tasini rekonstruksiya qilish, 42 ta suv minorasi qurish, 21 tasini rekonstruksiya qilish, 14,8 kilometr elektr tarmog‘i tortish, 59 ta transformator va 65 ta nasos o‘rnatish zarurligi aniqlandi.
Shiranovning qo‘shimcha qilishicha, bu ishlarni amalga oshirish uchun 61, 6 milliard so‘m qo‘shimcha xarajat talab etiladi.
Mavzuga doir:
- O‘zbekistonda 1-mayga qadar suv ta’minoti bo‘lmagan mahallalar to‘liq xatlovdan o‘tkazilib, toifalarga ajratiladi
- Shavkat Mirziyoyev O‘zbekistonda kelgusi 5 yilda ichimlik suvi ta’minoti 90 foizga yetkazilishini ma’lum qildi
- O‘zbekistonda 2021-yilda 1,5 mln aholi ilk bor markazlashgan ichimlik suvi bilan ta’minlandi
Izoh (0)