Navoiy viloyati Nuvabahor tumanida 250 gramm radioaktiv moddani noqonuniy ravishda sotishga uringan shaxslar ushlandi, deb xabar beradi IIV JQBB Korrupsiya va iqtisodiy jinoyatlarga qarshi kurashish boshqarmasi.
4-mart kuni Navoiy viloyati IIBga fuqaro ariza bilan murojaat qilib, u o‘z arizasida Navoiy viloyati Navbahor tumanida yashovchi ikki nafar shaxs radiy radioaktiv moddasini 50 ming dollarga sotmoqchi ekanini ma’lum qilib, ularga nisbatan qonuniy chora ko‘rishni so‘ragan.
Mazkur arizaga asosan, 5-mart kuni Navoiy viloyati IIB JQB Korrupsiya va iqtisodiy jinoyatlarga qarshi kurashish bo‘limi, DXX Navoiy viloyati boshqarmasi hamda Navbahor tumani IIB xodimlari hamkorligida tezkor tadbir o‘tkazilgan. Tadbir davomida tumanning “Qalqonota” mahallasida joylashgan “Shukrona” to‘yxonasi oldida ikki nafar shaxs bir dona shisha idishga joylashtirilgan “Radiy Ra 226 02 5” yozuvli 250 gramm radioaktiv materialni maxsus xaridorga 50 ming dollarga sotayotgan vaqt ashyoviy dalillar bilan ushlangan.
Holat yuzasidan 2022-yil 5-mart kuni Navbahor tumani IIB huzuridagi Tergov bo‘linmasi tomonidan Jinoyat kodeksining 252-moddasi (radioaktiv materiallarni qonunga xilof ravishda egallash) 2-qismi “b” bandi bilan jinoyat ishi qo‘zg‘atilgan. Jinoyat ishi yuzasidan tergov harakatlari olib borilmoqda.
Eslatib o‘tamiz, 2021-yilning oktabrida Xorazmda simob va platinani 530 ming dollarga sotayotgan shaxs ushlangan edi.
Izoh (0)