Prezident Shavkat Mirziyoyev raisligida sanoat kooperatsiyasini rivojlantirish va ishlab chiqarishni mahalliylashtirish chora-tadbirlari yuzasidan videoselektor yig‘ilishi bo‘lib o‘tmoqda. Bu haqda davlat rahbarining matbuot kotibi Sherzod Asadov ma’lum qildi.
Ma’lum qilinishicha, yig‘ilishda 2022—2023-yillar uchun 2,5 mingta loyihani ishga tushirish bo‘yicha qabul qilingan dasturning aniq ijrosini so‘rash vaqti kelgani qayd etilgan. Prezident ko‘p tarmoq va hudud rahbarlari bu masalada hali dunyoqarashini o‘zgartirmagani, hozirgi vaziyatdan xulosa chiqarmayotganini tanqid qilgan.
Ushbu dastur ijrosi bo‘yicha Farmatsevtika agentligi rejani 51 foizga, “O‘zbekiston temir yo‘llari” esa 10 foizga bajarmagani, ushbu ikki tizimda sanoat kooperatsiyasi bo‘yicha ishlar umuman boshlanmagani, “Issiqlik elektr stansiyalari” esa rejani atigi 26 foizga bajargani ko‘rsatib o‘tilgan.
Shuning uchun Farmatsevtika tarmog‘ini rivojlantirish agentligi direktori Sardor Kariyevga hayfsan e’lon qilingan. Uning ikkala o‘rinbosarini ishdan olishga ko‘rsatma berilgan. Shuningdek, bosh vazirga mazkur agentlik faoliyatini tubdan o‘zgartirish bo‘yicha aniq choralar ko‘rish topshirilgan.
Bundan tashqari, “O‘zbekiston temir yo‘llari” raisi vazifasini bajaruvchi Xusnutdin Xasilovga hayfsan, “Issiqlik elektr stansiyalari” raisi Farhod Abdurahmonov, “O‘zmetkombinat” direktori Rashid Pirmatov, “O‘zbekneftgaz” raisining birinchi o‘rinbosari Shahzod Alirizayevga qat’iy ogohlantirish berilgan.
Yanvar–fevral oylarida “Elektron kooperatsiya” portali orqali 860 milliard so‘mlik 5 mingta shartnoma tuzilgan bo‘lsa-da, ularning ijrosi ayrim hududlarda bajarilmagani, elektron savdolarda Qoraqalpog‘iston, Namangan, Surxondaryo va Xorazmdagi korxonalar ulushi 1 foizni ham tashkil qilmasligi tanqid qilingan.
Izoh (0)